#ParentLicenses2226

本人做IT業務，好多時要返深圳工作。我發覺香港硬件好落後，所以有時喺星期六日，我會帶埋小朋友返去playhouse玩同食嘢

可能嗰度消費價錢屬中上，現場都係一班讀過書，消費得起嘅大陸人。而留在大陸消費嗰班家長，都係有受過教育，比較識守規矩，就算有時會側側膊想打尖，你同佢講排緊隊，佢都會跟返隊。而嚟香港玩嗰班大陸人，比較上教育程度相對低，大多會參加啲平團嚟香港玩，係咁打尖又無品，迪士尼見到嗰班大陸人就係好例子

話說某星期六去咗深圳出名playhouse玩，現場九成都係香港人，其中就遇見一個約四五歲男孩、一個老母同一個阿嫲

當時好多小朋友排隊想玩跳彈床，不論大陸定香港小朋友都排緊隊。突然間，就有個約四五歲嘅男孩跑入去彈床想打尖先玩

工作人員禮貌說：「請排隊」

男孩即刻喊住跑去老母度，老母：「下，要排隊呀？哎喲，咁衰要排隊搞到你喊呀！哎呀，點解要排㗎，咁都要排隊」

我：「……」

點解唔係教小朋友想玩就要排隊呢？

轉個頭又見到呢個男孩，今次輪到阿嫲發功。阿嫲拉咗架唔俾駛入繩網區的車仔入繩網區，之後就同個孫講：「嫲嫲幫你霸住架車，唔俾其他人揸」

呢啲咁嘅家庭教育，究竟會孕育咩性格嘅下一代出嚟？

讀者投稿@MrsW