#ParentLicenses2225

諗起有件牽涉三代同堂事

有年同男友去行花墟公園花巿，到公園之前嘅路，逢經馬路位已經多人，到咗要截住過咗一輪再一輪人潮嘅狀況

附近有家人分散行緊（我點解知佢哋係一家人？因佢哋有離遠叫對方同對方傾計），有個推住BB車兼拖住細路嘅女人，佢口就叫個阿婆（唔知佢阿媽定奶奶）小心啲行，但又唔係癡住佢一齊行，由得個阿婆自己自由奔放

有一刻，阿婆明明係向前直線行緊（呢刻喺我側邊，唔喺我哋面前），但突然喺馬路上改變方向打斜行，隨即變咗喺我哋面前經過

我同男友立即側晒身，恐防會撞到佢。我男友因突然避佢，都差啲跌一跌。突然間，後面有個男人超大力推我男友，因我手拖住男友，佢被人推嗰刻郁到我手都屈一屈，所以我哋都一齊向後望睇下發生咩事

個男人就好惡死話：「你爭啲撞到佢呀！」（佢意思係指嗰個阿婆，不過唔知阿婆係佢媽定外母啦，仍然關係不明）

我男友問：「咁有無撞到？點解可以出手咁推人？」

個男人都明知無撞到，所以佢無答，只勁大聲重覆嗰句「你爭啲撞到呀！」

個阿婆喺呢個時候已行返屋企人側邊，阿婆自己都話無嘢

我追問佢哋：「做咩咁推人，避晒你都推？」

未幾，男人個老婆就喺我後面用架BB車不斷撞我對腳，叫道：「行啦行啦！」

我話：「行就自然行，使鬼你叫？」

我邊行邊繼續問：「點解我哋無撞到阿婆，重諗住避，都被你咁推？你轆我隻腳又唔見你話下自己？我話你咁驚人撞到自己老人家，又唔攬住護住佢行，又帶佢出咁人多咁危險地方？」

兩公婆答唔到，就只係繼續大大聲叫人行

事後同男友傾返，佢話嗰刻見到呢家人原來重有個工人姐姐喺側邊，我知道後更覺得佢哋荒謬好笑。下，就算個老婆推車拖細路「好忙」，個老公或者工人姐姐都可以拖住阿婆吖，咪唔使咁「驚」囉！一係除非個老公忙住拖住工人姐姐，但就算係，佢都有兩隻手吖，一邊拖一個囉

直到而家我都仍然記得嗰兩公婆惡型惡相出巡咁款大晒嘅樣。我想話，真係唔係你有老人家同細路就大晒㗎，人哋都係人，唔該互相尊重啦！

到底係咪阿婆當年唔識教仔/女，教到下一代咁，然後下一代又喺啲細路面前做壞榜樣？

讀者投稿@路人甲