#ParentLicenses1793

我係一個幼稚園K1學童嘅家長，星期六、日或放假時會約同學仔家庭去玩。但一齊出去玩咗幾次，先發現真係咩人都有

有次和其中一位媽媽去參觀一個要入場費的博物館展覽。到步後，當個家長經過收費處，就直行直過入去展館

我哋排完隊，俾完錢，再入到去搵佢，提提佢要買飛入場，佢竟然笑笑口話：「免費睇唔係仲好咩？」

我當場打個突，你個囡喺旁邊見住你咁做，唔怕會教壞啲小朋友咩？

回想大家又未算好熟，都完全唔知俾咩反應，唯有諗住下次去玩時，唔會再搵呢個媽媽出嚟

之後有次參加一個免費聽故事做手工嘅活動，另一個家長又叫埋呢個媽媽同小朋友去

活動指定用環保物料整手工，小朋友玩得好投入，點知一行出個活動場地，嗰位媽媽即刻講：「有冇垃圾桶呀？我想即刻掉咗佢，咁污糟，用埋啲垃圾整嘢」

我忍唔到講咗句：「呢啲小朋友用心機整嘅作品嚟，你使唔使問下你囡囡想唔想要返呀？」

講真，啲環保紙盒好乾淨，而且小朋友都用晒新顏色紙貼做好咗架好得意嘅車仔。點知，個媽媽轉身就行去垃圾桶，仲教個囡：「咁污糟，唔好要」

經過嗰兩次後，大家價值觀咁唔同，真係無謂一齊玩，唯覺得個細路女有個咁嘅阿媽真係慘

讀者投稿@軒仔