#ParentLicenses2068

喺一個公園其中嘅幾條滑梯，有不少只有兩三歲嘅幼兒，而且還需要家長扶助嘅階段，正在排隊玩滑梯，整體禮讓有秩序

此其間一直有幾個八到十歲嘅野孩子，旁若無人地橫衝直撞，於滑梯又逆行而上，或是打尖，或是推撞其他小孩，亦有嫌前面準備滑下的幼童動作慢，直接從後用手或腳推他們滑下或推開幼兒自己滑下

隨即有幾個幼孩嘅家長都出過聲叫佢哋唔好咁危險咁做，但佢哋依然故我繼續奔放

因為無影響我個兩歲半女，所以都係一直當食花生唔出聲，但之後到我個女滑嗰陣，其中一個野孩子推我個女滑下，佢再直接跟隨滑下，惟嗰下我即時攔佢滑同大聲喝咗佢一句，之後就落去睇返自己個女就無理佢

然而，及後無啦啦有個女人走埋嚟我度質疑：「做乜攔我個仔重要喝佢？！」

我解釋完，個女人都重係覺得我攔佢個仔有問題，竟然話佢推我個女都係因為佢個仔好心先幫佢。我無言了

離開之後我反思一個問題，其實明知有幾隻野孩子喺度，我覺得唔會影響到個女就繼續玩，其實我係咪都有問題?

圖片來源@P牌家長
讀者投稿@P牌家長