#ParentLicenses2069

今日帶我個三歲仔去公園玩，玩咗一陣要用腳跨過去嗰個設施（但我唔知點形容個設施，所以上網搵咗張圖）

直到我仔去到最後一級準備跨上返接駁口時，前面突然有兩個目測小三以上嘅小朋友跑過嚟坐低打機

我就教我仔同哥哥姐姐講「唔該借借」，問吓「可唔可以俾我哋過咗先」

然而個小朋友無望過我哋，只係邊打機邊答：「唔得呀，因為我好攰要坐吓」

我就指住前面長櫈話：「嗰邊有櫈，要休息打機可以過去嗰邊休息㗎」

小朋友繼續低頭打機，且無望我一眼，再答：「唔得呀，我要坐呢度呀，唔可以俾你過呀」

我堅持：「但係呢個係公園設施，可唔可以讓一讓俾我哋過左咗先呀？你哋要休息可以過去嗰邊坐㗎」

跟住我就周圍望下小朋友家長喺邊啦，一擰轉頭就見到有個女人望住我哋，同一時間遠處就有個男人開聲喝令兩個小朋友返落地，兩個小朋友都即刻跑咗過去男人嗰邊

隨後個男人突然就嗌過嚟話：「係呀！佢哋腳痛呀要坐呀！佢哋頭先整親腳呀」

我老公就講：「腳痛要休息就返屋企休息啦！」

個男人不悅，就拉低口罩，抱住個目測兩歲嘅小妹妹衝過嚟大鬧：「咩事呀你而家？！我而家咪處理緊囉！我唔係唔處理呀！佢腳痛要抖呀！你咩事呀？！你想我點呀！你想我點呀！我而家唔處理咩？！你嘈乜撚嘢呀！你係咪想打交呀！你想點呀而家！」

我老公就答佢：「而家唔係大聲就大晒，唔係講粗口就代表你威啲㗎先生」

其後個男人嘅朋友就跑過嚟抱走男人手上嘅小妹妹，重有途人拉開兩個叫：「一人少句啦，大家帶小朋友出嚟玩都係為開心」

呢個時候對方小朋友嘅媽媽就出聲鬧我：「你望咩呀而家！你想點呀而家！我頭先都見你啄住佢哋（嗰兩個小朋友）好耐㗎啦！」

當佢講呢句我就叮一聲明晒，原來佢哋一直喺後面望住而容許佢小朋友霸住條路；再講，佢小朋友跑得咁快，哪來整親腳？咁我就覺得無必要花時間同佢哋嘈落去

而且，我見我仔都有啲驚，所以我就叫我仔：「走喇，去第二個公園玩」

呢個時候我仔就開始喊，嗰個男人同女人就喺後面大聲講：「你睇吓！要個仔話走就走喎！」

無奈我就帶住我仔離開咗嗰個公園，而由頭到尾佢兩個小朋友都係繼續低頭打機，完全係無望過我哋一眼

真心想問吓大家，公園設施俾人霸佔，我教我仔講「唔該借借」都唔得咩？利申：我由頭到尾都係禮貌客氣地問嗰兩個小朋友

圖片來源@誰大誰惡誰正確？
讀者投稿@誰大誰惡誰正確？