#ParentLicenses2030

突然間想分享一個好耐好耐之前嘅故事，一個有關少少欺凌嘅故事。故事中呢個「欺凌」，或多或少係因為佢呀媽而做成，但因為年代久遠，而且我思路有啲亂，可能會寫到好亂，希望大家包容下

話說廿幾年前我讀中學嘅時候，經常會去社區中心玩，放親假唔係跟社區中心去露營就係去宿營（小學到中學都係咁），算係呢方面經驗唔少

有一次係去露營嘅，而我哋去之前會有個營前會，意旨透過玩下破冰遊戲來認識下大家，以及分定組傾下去露營嗰日各自要負責帶咩咁

一般呢啲破冰階段嘅時候，大人都唔會跟住，但係嗰次有個男仔（今次嘅男主角，我叫佢A啦），佢呀媽帶埋個工人姐姐全程坐喺旁邊

我哋作為其他參加者，第一個感覺就係唔自在同有壓力，第二個感覺就係A嘅呀媽搞到我哋唔自在

不出所料，最後嘅結果就係互相認識嘅時候同玩嘅時候都冇人會行埋A度，甚至嗰下大家已經有意無意將A排除在外。唔知係咪因為咁，A就好自然自己喺房嘅另一邊自己玩，然後佢呀媽就又好似好緊張咁，想拉返佢返嚟。不過佢呀媽咁做對事情無甚幫助，因為我哋根本冇人想理佢，剩係覺得佢阻住晒

跟得社區中心去，基本分組玩遊戲，完成主持定嘅目標等等，呢啲就係基本內容，而我好可惜地被分咗去與A同組（組入面重有其他人，印象中嗰次係5, 6個人一組左右，共分咗兩組）

出發前，其中一項被指派嘅任務係俾一筆錢我哋自己商量嗰晚煮咩，要由自己去買，任務目的係想訓練團隊溝通同錢銀預算安排

正當我哋已經傾好晒買咩嘅時候，A呀媽夾硬隊咗兩條方包過嚟。我哋話唔要，都冇人想食，但佢死都要我哋收，咁變相我哋又要計返錢俾佢，打亂我哋嘅計劃；唔俾佢，對隔離組又唔公平

最後我哋被逼收咗兩條冇人想要嘅方包，同時又少咗可動用嘅錢。當然呢啲氣最後又報返落A度，事情發展去到呢度，大家對A已經好討厭

到出發嘅時候，我哋要分工孭埋營具、cook set、食材等等嗰啲公家嘢，自己組孭自己嘅嘢。我哋年紀偏大嗰幾個其實會主動孭啲比較重嘅嘢，留返啲比較輕嘅俾年紀小嘅處理。當中我哋嘅宗旨係多多少少，都要幫手拎一啲，因為大家係一個團隊

然而，就因為嗰兩條方包，導致喺分工上又出事啦

事關嗰兩條包本身就唔係我哋計劃嘅嘢，我哋好自然就扔返俾A自己拎，然而相對地，團隊中佢應該負責拎嘅嘢就拎唔到（我哋完全唔覺得嗰兩條包算係公家嘢），要其他人幫佢拎埋。不過見佢年紀比較細，始終嗰兩條包都唔算輕，嗰下大家都冇話想太為難佢，只係算你自己嘅鑊你自己孭返，但係當然討厭程度又增加唔少啦

件事去到呢度，其實可以話大家對A嘅討厭，完全因佢呀媽而做成嘅。其實如果佢要咁緊張個仔，就唔好放佢出嚟啦，咁同搞串個party有咩分別。大人想佢學識獨立，就唔該大人先學識放手

千辛萬苦下終於離開咗佢呀媽，我哋出發啦！

諗住冇人搞搞震應該好過啲啦，點知就到A各種作死行為，令大家終於忍唔住用唔同方式針對佢，例如口頭上帶人身攻擊嘅說話、身體上各種借啲意嘅推推撞撞（行過撞下佢，但係唔會撞跌佢嗰種）等等

凡冇社工監住，大家一係唔理A，一係對A唔客氣，不過詳細嘅就唔喺呢度講，雖然好明顯係屋企教育問題，但係同家長冇直接關係，若果大家想知，可以之後再講

我唯一想提嘅事係，於回程嘅時候，喺車度發生咗一件事。當時A又被安排坐我旁邊，然後A打乞嚏唔掩口，鼻涕噴咗落我度，嗰下真係覺得好噁心

我即刻問人借紙巾，但A嘅反應就好笑啦，佢剩係望住我又唔出聲，咁我抹好自己之後見佢望住我咪俾張紙佢啦囉，奇怪佢又唔接，剩係伸個頭過嚟

我心諗：「你唔係諗住我幫你抹啩？」

A雖然話年紀比較細，都起碼高小啦，唔係鼻涕都唔識抹啩？！最後我紙巾都收返埋，冇再理佢。直到返到社區中心，A呀媽又嚟接佢，我經過佢呀媽身邊嘅時候都忍唔住講咗句：「都唔知點教仔㗎！」

呢個故事最後想講嘅係，家長你唔考牌就生仔，生完又唔教，就唔好怪人喺你背後用人哋自己嘅方法幫你教，佢會俾人蝦完全係家長做成㗎，唔好怪人

讀者投稿@說故事的人