#ParentLicenses1394

星期日去咗荃灣某大商場嘅冒險樂園玩

逢係假期，呢個場入面嘅迷宮樂園必會爆場，所以等一節玩完就即刻要排隊等玩下一節

當時我就排比較後面，喺我前面排第三個的媽媽（下稱A）將佢手上嗰隻河童公仔放咗落去迷宮門口，自己就喺度撳電話

不久，排佢後面嗰個弟弟就貪得意推咗隻河童公仔入去迷宮

媽媽A即刻起晒弶咁話：「做乜將我隻公仔推入去？！」

弟弟已經即刻同媽媽A講對唔住，不過語氣仍有嚇到弟弟

媽媽A把口就話唔緊要，但係啲對話就係好有骨，搞到弟弟嘅媽媽勁唔好意思

之後，媽媽A自己想即刻入去執，但有工作人員勸阻。等咗一陣之後，由工作人員幫佢執返隻公仔出嚟

媽媽A執返個公仔之後拍一拍公仔上嘅灰塵，然後又擺返去迷宮門口個位置，自己又繼續撳電話。每隔幾分鐘佢就拎公仔拍一拍又放返原位，唔知係佢特登做畀人睇定係其他原因啦

差唔多入場，職員就問每一位排隊人士有幾多個小朋友入

媽媽A數咗一陣就話：「6個，佢哋之後就會到㗎喇」

職員同排佢後面嗰啲人都呆咗一呆，但都係繼續幫佢mark咗六個

到真正開始入場嗰陣，嗰6個小朋友終於出現，仲帶埋另外5個唔知係媽媽、姨姨定姐姐嘅物體過嚟

有趣嘅係，媽媽A已經忘記咗佢隻公仔，而且俾其他小朋友喺度搞，玩嚟玩去。媽媽A 的另外五個家長朋友就圍住個櫃台，而嗰6個小朋友已經除定鞋，準備好開門跳入去

好啦，到職員開始幫家長登記同數代幣，班小朋友已經急不及待入晒場玩緊。職員收完前面嘅錢之後就叫後面嘅人行上前登記

突然之間，圍住櫃台嘅媽媽A同另外3位媽媽即刻好嬲咁鬧職員，話：「我哋排先！係咪睇我唔到？」「我哋呢度有6個，你唔係睇唔到呀吓？！」

排後面嗰個媽媽望落個樣好尷尬，職員就幫佢哋登記先。而後面其中一個媽媽仲要好冇禮貌，喺職員數緊代幣期間又話：「兩個、三個定四個入場，你數清楚呀！」

等咗一陣之後啲媽媽終於四散，以為件事就咁結束？

玩到半個鐘之後，媽媽A的其中一個朋友帶住個仔叫職員俾佢入場：「佢都係玩半個鐘，你收成個鐘嘅價錢，你哋有so啦」「入多一個唔覺嘅」「都有一兩個走咗咯，冇所謂啦」

前前後後擾攘咗起碼五分鐘，職員唯有偷偷地後來嘅小朋友入場，哩個小朋友嘅媽媽仲要同個仔講：「我會幫你去排玩卡game，等你出嚟可以即刻玩」

點解我會確信係媽媽A嘅朋友呢？因佢一開始就好大聲話佢幫埋朋友排，總共要6個位，但頭先只係入咗五個，所以剩低個位就係後來嘅小朋友，一定要俾佢入場

最後就唔知有冇事發生呀，因為我已經帶埋我小朋友走咗

其實班小朋友冇乜嘢，入去玩時見到細過佢嘅小朋友仲會好有禮貌咁讓人哋玩先，真心希望佢哋大個唔會好似佢哋老母咁樣

同埋如果嗰班老母睇到呢個post嘅話，我好想同你哋講：「好心你就專重下個場喇，個個父母都係想俾小朋友玩啫，你一個人排曬6個位，你哋成班家長好唔好意思呀？」

讀者投稿@原來自己不是虎媽