#ParentLicenses2070

睇完去林村個投稿後，我都想交兩件功課

█ 延伸閱讀?? #ParentLicenses2063 https://parentlicenses.hk/?p=3757

第一件功課

一年前左右，新年去文武廟祈福拜神

大家都知道香火鼎盛情況有幾勁，人頭湧湧而且週圍都係善信拎住香同蠟燭， 大人入去幾分鐘都頂晤順，會標眼水同埋呼吸困難，如非必要都會盡快走人

正當我「一殼眼淚」衝出廟大門口時，即見到一對年輕夫婦拎住一紮香打算行入來

而問題係個媽媽心口孭住一個配戴一頂防疫帽嘅BB，目測四至五個月大，當下我即刻用平靜語氣同佢講：「入面好大煙好辛苦，有小朋友唔好入去了」

個男人聽到就勸話：「咁你（媽媽）唔好入去了」

個媽媽對眼睥了我一下，再拉住爸爸隻手話要入，更話因為文武救佢BB一命

我無再理會就離開了

如果呢對父母有睇到，我想講你哋好有心呀，但需要更細心啲，因為小朋友太細個入廟，聞到香火會好辛苦。我相信神明絕對不會因為BB無入廟去謝神而怪罪於佢

藉此，我也希望其他家長帶小朋友去呢啲香火廟時會多加考量，煙有無毒唔在講，被煙火辣到、燒到的話，後果更加可以好嚴重，謹慎小心呀

第二件功課

有一日放工行經信德天橋樓下馬會，中午食飯時分但落緊雨

而喺馬會門口及天橋頂之間係有一道細縫，當時係有雨水會直接漏落嚟馬會門口。當行去門口位置時，發現有一架BB車泊喺門口，車上面有一個約一歲多嘅BB，醒但想喊。BB車嘅週圍係無一個大人喺旁邊，另我聯想到係有人為入馬會而將BB同BB車放喺門口，而且重要係落緊雨！

我當時真係無比憤怒，真係好想破口大罵究竟係邊個可以咁不負責任，任由小朋友自己一個喺門口淋雨，而且門外人來人往，真係好危險

雖然好想大叫「邊個放BB車喺度」，但我最終無咁做，因為東南西北我真係唔知向邊個方向大叫好，只係無奈靜靜企喺附近一兩米遠處睇住BB，因為驚佢有危險

直到而家，我仍然後悔當時無報警。真的太過分了，雖然無法得知推BB車放低的人係邊個，但作為父母嘅你哋都應該要警惕一下，如家中有人熱愛馬會多過小朋友，你哋真係要睇緊啲

讀者投稿@Lc