ParentLicenses1454

星期日，我同阿媽、阿女（兩歲）坐上由元朗開往紅磡嘅黨鐵

假期多人就必定㗎啦，上車已經見無位，咁就企咗喺近車廂接駁嗰啲位置啦

鄰近座位一邊就有對父子坐喺度；另一邊就有個媽媽抱住個應該歲幾嘅BB

唔知個BB咩情況，係咁扭計，又喊，又唔肯坐返喺BB車。無論係搵嘢引佢呀又好，畀水佢飲呀又好，或者畀嘢佢食，BB都係唔接受，只係咁喪喊

眼見嗰位媽媽都唔好意思，因為佢個BB係喊到引起咗「BB效應」，全車嘅BB都一齊喊，只係除咗我個女，佢過份冷靜

全程我都覺得嗰位媽媽好辛苦，其實都好想幫下佢，但又唔好意思話插手

咁我個女就有個Baby Shark嘅玩具電話， 就撳咗有啲聲，成功咁令個BB冷靜咗……幾分鐘，過後又打回原形

直到去到某個站，突然對面個男人爆咗句：「佢對上幾時食咗嘢呀？」

我哋諗：「唔會係想投訴呀嘛？」

個媽媽回應咗之後，男人隔離個男仔就起身喺BB車度拎咗個水樽畀個媽媽

呢一刻，我哋先發現，原來佢哋係一家人?

但講緊係，個BB喊咗咁耐， 一路都只係得個媽媽獨力去安撫BB??

呢個過程完咗，就咁啱佢哋都落車，令個車廂又變返好安靜

成件事上，隊友真係好重要！如果嗰個男人唔係有出聲，以佢一路都係好冷漠嘅樣，真係無人會知佢係爸爸嚟，佢一出聲嗰下，除咗我同阿媽外，其餘嘅人都O晒咀

其實BB 唔係得媽媽一個有份，爸爸都有份，如果爸爸有出手，相信嗰位媽媽應該唔會咁吃力?

補充返，當BB 喊到好犀利嗰時，車廂內都有啲我諗廿歲頭嘅男女喺度不斷議論個BB

我個人感覺佢哋嘅眼神不太友善，其實咁講，佢哋都總有一日會做人父母，或者自己細個都可能有咁做過，係咪唔使咁不滿咁嘅呢?

Sorry for 19999

電影截圖@無間道
讀者投稿@KinKi Kids 大fans