#ParentLicenses2206

由幾時開始香港人嘅質素越嚟越內地化？

話說七一上萬達廣場個Party Day玩高空飛索，條隊目測唔夠廿個人。當我去排隊嘅時候，職員同指示牌都講明唔准代排

結果我哋排咗接近兩個鐘頭，就係因為我前面嗰位香港靚太葉問上身，一個頂十個，一個人企。排到佢嘅時候，突然就會有幾個唔同家庭嘅人出現，而佢本人自己就狗衝出去享受設施，留低一堆細路喺度

眼見咁嘅情況發生，而場地又接近關門時間，我唯有同職員反映

我問職員：「係咪就算到關門時間，只要我有排隊都有得玩？」

職員細問下發現情況，所以佢就話俾返我玩先，因已有既定規矩指明不准代排

呢件事我都唔想同佢哋嘈，點知其中一位目測九歲嘅細路突然現身，佢不斷喺我背後極度挑釁地叫囂，話我打尖。本來唔想幫人教仔，結果都係要教育下佢咩叫「禮貌」同「代排」

原本我當個細路唔識嘢，都唔係好勞氣，點知靚太玩完就上嚟同我嘈交，堅持話我打尖

靚太：「高空飛索係親子活動，我帶埋個細路嚟有咩問題？」

我真係第一次聽高空飛索可以歸類為一樣親子活動，原來係一齊飛？而且個仔嘅同學仔都係你親人？

靚太再三堅持：「我哋係有排隊，只不過走開咗咋嘛」

終於激發起我小宇宙，我同佢講：「呢個係代排問題所在，而家唔係去個廁所咁短時間，而係親眼睇住佢哋出去玩，從來冇見過佢哋嚟排隊」

隨後，個九歲細路竟然可以嘈話職員冇話唔得，甚至選擇性失明，謊稱指示牌冇寫唔得

後來，喺職員嘅勸解下，我唯有喺嗰兩位母子嘅叫囂之中，用僅僅四十九秒嘅時間享用我花咗接近兩個鐘頭排隊所得嚟嘅高空飛索。當我飛完返嚟，個九歲細路仍然繼續挑釁，而且重出動埋爸爸嚟嘈交

當刻我心底裡不敢慨嘆「你的老母如何，你的細路也必如何」。家長嘅行為完全冇身教可言，教到啲細路去撩交嗌，將黑講成白，將原本我哋香港人以往良好嘅排隊素質通通降低晒

事已至此，我哋今時今日重可唔可以大大聲話內地人打尖？

讀者投稿@香港人