#ParentLicenses2207

事先聲明，今次投稿係想感謝兩位肯出手幫忙嘅香港人

話說早前我嘅小朋友腸胃炎，帶咗佢去睇醫生。喺準備搭西鐵回程之際，小朋友突然噴泉式嘔吐

因為小朋友戴住口罩，所以佢嘔吐時就發生反噴射效果，導致佢由個頭、面、身體、腳，以致鞋仔都有啲嘔吐物之外，而且都嘔到一地都係。相信大家剩係諗都諗到當時係有幾咁狼狽同混亂

當時得我一個女人同滿身嘔吐物嘅小朋友，我即刻放低個袋，攞濕紙巾幫小朋友由頭開始清理。小朋友嘅嘔吐物範圍都幾大，我不斷喺度抹同抹，估計都有十幾分鐘

時間正值中午12點半左右，我哋企喺西鐵站同商場之間，人來人往，商鋪全開，但係路過嘅人一係就避開無視兼嫌棄，一係就一路行一路食住花生睇，而商舖啲sales就企咗出嚟，惟雙手插袋觀望發展而已

後來，有兩位十分好人嘅姐姐特登回頭，佢哋俾咗我一大堆袋，同時我小朋友因唔舒服而開始發脾氣，佢哋就立即帶我哋去U記買衫，更幫我哋將已包好嘅垃圾拎去廁所棄置

我明白大家都有大家嘅原因先會選擇視而不見、掂行掂過或者原地不動，當然我當時都唔係喊晒口求救，只係盼望如果香港可以多啲體諒同互助，少啲嫌棄同漠視，我哋嘅小朋友就會更加正面

其實嗰兩位姐姐係趕時間嘅，佢哋係特登回頭，希望佢哋睇到呢個post??

讀者投稿@噴泉媽