#ParentLicenses2227

今日去連鎖店食米線，隔籬枱坐咗個大約六至八歲嘅小妹妹同一位伯伯

一坐低後，我已經留意到個小朋友手上部電話開到好大聲咁睇卡通，聲浪甚至比我自己小朋友講嘢更大聲。然後又不停聽到佢扭計要睇卡通，食物嚟到又扭計唔食

本來我都唔想出聲，但我見到妹妹將自己舔過對筷子插返落筷子筒（筷子筒喺我張枱），我已經即刻喝住佢唔可以咁做，但佢已經插咗落去，而我亦搵唔返邊對筷子

當時負責湊佢嗰位伯伯只係輕描淡寫講咗一句：「唔可以咁做㗎喎」

見伯伯完全將個問題忽視，我就惟有搵職員，當面再講呢位妹妹嘅不是，希望妹妹會知驚（最後當然無），然後職員收走筷子筒聲稱會全部洗一次

最後我擺出一副最兇惡嘅樣望住小妹妹，唔想佢再扭來扭去。小妹妹終於定返少少，不過最後都係要倒瀉食物落地下先走

好明顯妹妹嘅行為係老人家縱出嚟，我唔明為人父母，點解生佢出嚟，但就將教養嘅責任推俾老人家

讀者投稿@任何人