#ParentLicenses2016

今時今日嘅小朋友真係令我大開眼界

今日我同我小朋友去老麥食晏，咁我地拎咗嘢食無耐，坐低見斜對面有個小朋友（年約小四、五）一個人來餐廳，拎咗盒學校訂嘅飯盒出來

其實呢個小朋友都醒，佢特登揀咗督督位置開餐，又自備餐具，重去咗斟兩杯水，一杯洗餐具，一杯用來飲

當時我已經覺得佢係應該習慣咁做，不過見餐廳唔算好爆，我諗店員見到都會體諒啩，我估計佢應該都係嗰啲飯後要返學校有活動嗰種。當然我就一定唔會咁做，我係平時去等補習時即使坐喺快餐店都會叫杯嘢飲下

食食下，見佢同距離大約4米嘅另一枱識嘅人打招呼，跟住戲肉就嚟啦

佢食飽後隨即執嘢起身行去嗰枱客度打機，重用普通話同人講：「我吃飽了」，然後相片中嘅攤子就咁擺喺度等店員執

查實你好唔好意思呀？一蚊都無幫襯都算，就當你係純粹借人個位坐嚟方便下食飯，但外來帶嚟啲嘢唔係應該自己執返佢咩？！

然後過咗幾分鐘，見有店員執枱，我就示意個店員「係嗰邊個小朋友食完，其實你應該叫佢執返，始終係佢自己帶來嘅嘢食」，但店員真係好好，佢默默承受，幫佢掉咗個飯盒同水杯

為人老母，假如你哋小朋友係每日咁樣在外食飯，麻煩你哋教下自己嘅小朋友有啲手尾啦！就算係去公園食，食飽後都要扔自己啲垃圾啩？

雖然之前都見過有老母帶小朋友飯盒去老麥開餐，但至少個老母都有幫襯下買一個餐俾自己，然而今日見到呢個情景真係覺得匪夷所思！人哋一蚊無賺之餘，重要蝕埋兩隻紙杯加埋要幫你善後

文章來源：讀者投稿@MM