#ParentLicenses2681

繼上文 #ParentLicenses2670 ，嚟緊呢幾件事件都比較長篇

事件五

但凡有去過Playhouse、冒x樂園等等，相信都知道波波池內係唔准飲嘢食嘢，當眼之處都會大大隻字寫住「不准飲食」

好啦，以防有人唔知，我哋不厭其煩地提一句「波波池係唔可以飲食」。又好啦，當你真係唔記得，同事A出嚟再提你。第二次，同事B又見到，再講

如是者，我哋已經發現同一批家長小朋友第三次拎嘢飲入去，今次重要係大大包麥精，喺波波池啲地氈下面摷返出嚟

到我岀去同家長講：「唔好意思，我哋波波池裏面唔可以飲食㗎！因為已經講咗三四次，如果再發現，我哋就可能要禁止小朋友喺嗰個區域遊玩😔🙏🏻。因為如果喺裏面倒瀉咗飲品，我哋係要將成個波波池嘅波吸出嚟，再清潔。希望你明白，唔好再帶飲品入波波池啦，麻煩晒🙏🏻」

家長：「某某（小朋友個名），姐姐叫你唔好再拎飲品入波波池！」

咁我覺得家長嘅回應尚算正常，遂同家長講咗句「唔該晒🥰」就返返去自己位啦

當晚‎公司阿姐就WhatsApp我：「有今日B時段客人話你唔俾小朋友飲水」

我：「🤔🤔🤔？？？？？？」

事件六

我哋公司係有個雪池，雪池嘅粒粒（彩色圓膠粒，類似BB彈大小）只可以喺入面玩，並唔可以帶出嗰個區域，因為好難執，既會搞到周圍都係，整咗出嚟又會跣到人，當眼之處又係大大隻字寫住㗎！

另外，我哋建議遊玩年齡係三歲或以上，而三歲以下兒童就要家長陪同使用！如果唔係，呑咗落肚又懶我哋🤷🏼‍♂️

我當你睇唔到個告示牌，當你小朋友第一次攞雪池嘅粒粒出嚟嘅時候，我已經有提醒過，但成班家長仍然喺度吹水，任由小朋友𢳂啲粒粒出嚟🌚

冇人阻撓下，小朋友直頭用個玩具桶裝啲粒粒倒落其他區域地下，成地都係😒我行過班家長到反映，又係冇人理我

眼見啲粒粒成地都係，實在無奈，我唯有行過去同小朋友講：「小朋友，我哋啲粒粒係唔可以拎出嚟㗎，我哋喺返入面玩好嗎？」

家長好緊張行過嚟，再捉住我手臂：「你有咩同我哋講就得！唔使搵我哋啲小朋友！」

當晚佢向公司投訴，內容係話我由佢哋一入到嚟，就不斷開始話佢哋，限制佢哋使用場地，限制佢哋小朋友玩

事件七

工作期間，我哋長期坐喺門口counter嘅，有客人入嚟就招呼佢哋，登記後俾完錢，再叫佢地除鞋著襪入場玩。客人使用場地時，我哋唔會特別喺場入地面，因為我哋喺counter入面可以隨時透過鏡頭觀察場內情況，除非睇到有問題（好似上面事件五同六咁），我哋先會行入去提醒家長注意，否則我哋係可以做自己嘢

後來有個可能對場地不滿意嘅客人喺公司專頁留咗劣評（我都唔係話咁愛公司，其實有劣評都唔關我事），內容指「……啲職員勁hea！兩個坐喺度玩手機！下下都要問先答，啲嘢冇話一早提供俾客人㗎！浪費我玩嘅時間，重要行出去問佢哋！」

睇到我無言以對。你愛呀？你愛就要講清楚㗎嘛！你愛，我自然會俾你，你唔愛，我梗係唔會俾你啦！冇理由你愛我唔俾你，你唔愛我就偏偏要俾你，大家講道理呀嘛！而家我數三聲，你講清楚你愛唔愛啦喎！

我真係忍唔住心入面講句「屌你老母」，一睇佢評論我就知邊個，因為佢超級冇禮貌。

當時佢走嚟問：「有冇筆？」
冇問題，借俾佢

隔一陣，佢問：「有冇枱布？」
成卷俾佢

再隔一陣，佢問：「有冇紙？我哋要寫number抽獎」
咁拎咗張白紙俾佢

再嚟，佢話：「你支原子筆唔啱用囉，有冇marker？」
我：「可以啊，冇問題🥰！」

佢每次嚟問嘢，我同同事都係即刻放低電話，禮貌地回覆，但你自己唔一次過問，就話我哋唔一早提供，我唔會一大堆文具放出去枱面俾你下話？成個多啦A夢法寶袋放低俾你好冇？大佬我點知你要咩啫

我記得喺俾枱布佢時，聽到佢同朋友講：「佢就咁俾我喎」

咁你想點？你想我幫你鋪你可以岀聲㗎嘛，係咪？悟空，你又曳曳啦！

事件八

我哋公司包場開party係有畫分一個區域用作飲食，咁正常都唔會有佈置，係讓客人自己自由地去佈置。除非客人向我哋公司book咗場地佈置，又或者客人自己搵‎公司去做場地佈置，先會喺客人嚟之前有佈置

客人：「你哋連『Happy Birthday』都冇㗎？！」

我：「因為唔知客人開party嘅性質，所以我哋只係提供場地，不提供佈置。如果客人有需要，我哋有『Happy birthday』嘅掛飾可以買，$20。」

客人：「Happy Birthday都話要收20蚊，正常我上次去其他地方都會有提供啦！」

你咁在意happy birthday都唔自己買，開咩生日party啫

相片來源@CapTV
讀者投稿@被投訴既小薯staff