#ParentLicenses2680

今晚冇煮飯就同仔仔出街食，但成餐飯我都係好想快啲食完走

去到某餐廳坐低無耐後，隔離枱嚟咗一家人，當中有兩個讀緊小學嘅小妹妹，著住校服嘅（因為之前仔仔都有考過呢間學校，所以一睇校服就知係邊間小學）、媽咪同埋一個唔知婆婆定嫲嫲

媽咪行咗出餐廳，家姐想出去，個妹又想跟埋，妹妹就俾家姐鬧，重要郁手打妹妹。見到咁嘅情況我嚇一嚇，心入面就嘩咗聲，點解會咁樣對妹妹。後來又聽到家姐對婆婆/嫲嫲講嘢冇乜禮貌，就諗好彩之前冇take呢間offer，原來教出嚟嘅小朋友係咁樣嘅

媽咪一行返入嚟就話家姐搞到個妹撞到個頭，問佢點解可以咁樣對妹妹，然後就扯家姐耳仔，再問佢係咪食＿㗎，blahblahblah

妹妹要求同家姐分開坐，婆婆/嫲嫲就對家姐郁手郁腳，勁大力推家姐。睇到呢度，我就覺得難怪家姐都會咁樣對個妹郁手

然而，佢哋坐低好晒之後，佢哋嘅對話真係令我倒抽一口涼氣，但其實我都唔想聽，惟同佢哋張枱實在痴得太埋

媽咪：「點解你係都要痴住家姐，家姐都唔鍾意你」

妹妹喊住講：「咁點解要生我出嚟？」

媽咪：「咁點解你要去我個肚？」

家姐：「如果冇咗你，咪唔會咁樣囉！」

媽咪隨即對住家姐講：「就算冇妹妹，你一樣都係咁衰格㗎！」

佢哋整餐飯都係咁樣鬧嚟鬧去

聽到兩位小朋友咁樣講嘢，作為家長嘅我都有啲擔心，始終而家香港好多小朋友處理唔到自己情緒，除咗學業壓力，就會因為屋企問題走去做「空中飛人」。不過其實呢啲都係人哋嘅家事，唔關我事，所以我都只係耷低頭食我嘅嘢，點估到我無啦啦「躺著也中槍」呢

媽咪：「你繼續咁樣囉，你影衰你間學校咋。你著呢套校服係人都知你邊間學校，一陣等隔離嘅人打去學校投訴囉，話埋俾隔離知你讀咩班囉，讀4x班」

眼見得我張枱同佢哋咁近，其他枱都未必聽得清楚你哋講乜，好明顯係同緊我講。其實我都只係望咗你哋幾眼而已，可唔可以唔好拖埋我落水呢？

最後，我都好想同呢位媽咪講：「唔會影衰間學校㗎，我唔會打去學校投訴，因為我只係睇到家長係點樣對小朋友。呢啲並唔係學校問題，而係家教問題。希望你可以好好咁諗清楚，唔好日後發生咗啲咩憾事先嚟後悔

讀者投稿@我想匿名