#ParentLicenses2682

今日買完晚飯搭34M返屋企，聽見有大人同小朋友爭吵

起初係大人同小朋友傾緊計，適逢小朋友講緊嘢嘅時候，大人嘅電話收到訊息要回應，遂去錄語音訊息而冇繼續理會小朋友

小朋友表示唔開心，然後大人開始指責小朋友唔開心，並且開始無視小朋友。小朋友被無視就更唔開心，大人就開始鬧小朋友，並放話要留小朋友去老人家度。於是，小朋友更加唔開心，開始喊，並哀求大人唔好咁做。大人冇理會小朋友嘅哭喊，反而係開始大聲吼小朋友，鬧佢「羞家」「次次出街都係咁」「嘈到全車人都聽到」，直至落咗車都鬧不停

我覺得小朋友好慘，不吐不快！我唔係想去評理（根本無理可評），只希望各位聽完呢件真實事件引以為鑒，反思一下自己有冇無意識地做咗事件中家長個角色咁，如有嘅，懇請你立即停止，咁樣對小朋友傷害好大！

首先當小朋友講緊嘢，大人就走去覆語音訊息，已經係大人錯；再者，大人冇去理解小朋友點解唔開心，一味指責小朋友唔應該唔開心，都係大人錯；更甚，大人竟威脅要留小朋友去第二度，對小朋友而言，即係要拋棄佢唔理，大錯特錯呀

小朋友怕大人唔理佢，所以開始驚同喊，情緒波動應該即時處理，但大人不但完全冇理，而且繼續不停鬧，完全冇控制自己情緒，不停用好難聽嘅語言繼續大聲鬧，大人繼續錯落去！

我相信全車人聽到嘅應該只係個大人不停鬧小朋友，但根本全部都係大人嘅錯，小朋友真慘！

讀者投稿@B