#ParentLicenses1474

我同老公有一個仔，自己係在職媽媽，老公公有20個堂/表兄弟姊妹，有啲可能幾年見一次，甚至更耐

上年已經有兩個同佢完全唔熟的堂弟搞婚宴，由於佢個堂細佬同我家姐嘅生日撞埋同一日，而我家姐要返工，只有夜晚先得閒，變相我去唔到是但一邊

當時我就同返老爺奶奶嗰邊講，想溝通一下，但佢哋同老公都不斷指責我

老公話：「 知唔知你咁樣會得罪我哋親戚好多人？我哋嗰邊有成40幾人，你要就下佢哋，以免我俾父母同埋其他親戚指責一世，咁樣好羞家㗎！」

老公續道：「個個都叫我勸到你去為止，我哋當中好多人都特登請假出席，如果因為你一個搞到我同父母哩家人俾人話嘅話，真係害死我哋㗎！」

老公再嘮叨：「寧願你就晒我哋咁多人，好過我哋咁多人就你呀！你都要企喺我哋哩邊著想。我話你聽，好彩今次係星期日，你唔使返工，如果唔係你都要請假去！結婚都係一生人一次啫，點解咁都唔肯體諒？你家姐生日年年都有㗎啦！」

我聽到之後真係好鬼嬲，點解我連哩啲嘢都冇自由？要俾你哋所有親戚指責當我係衰人？今年你又有個表哥結婚呀，唔通我次次都要為哩啲事頻撲？

我自己都有親人要理，今次家姐生日我都冇要你特登請假去啦，你仲想點？我真係應付唔到你嗰邊咁多人，好難百分百出席

可能上年我嬲得滯，結果去到當日咳，「被迫」去做檢測，咁就冇辦法啦，結果啲人都冇聲出，始終疫情問題，咳都可大可小

可能連個天都幫咗我出返呢啖氣！另一個堂表弟就撞啱疫情大爆發就取消

今次老公表哥婚宴係撞正我要返工嘅平日，但今次我唔會再搵藉口，一定會直接同佢講：「因我公司嘅問題，唔能夠因為老公嘅表哥而拖累公司嘅運作，咁樣我係好任性，唔體諒公司！」

佢表哥每次一見到我個仔，就會大力搣佢塊面，如果我哩個做媽媽嘅都唔能夠用強硬態度去反抗返佢父母同其他親戚，咁我仲學咩人做媽媽？點樣保護個仔？

遇到問題一定要出聲，大家坐低解決，而唔係似個豬隊友咁，樣樣嘢都話忍！

我自己都要以身作則教導個仔，啱就要聽，唔啱就要出聲！老人家並唔代表樣樣嘢都啱，如果唔合理嘅，話知你哋幾十個親戚輪住鬧我，我都唔驚！要有道理先得㗎嘛！

我就係唔鍾意佢哋上年嘅態度，所以今年我點都唔會出席，除非今次佢哋傾嘅態度都溫和，咁我就服啦。唔想因為一啲太傳統嘅思想而影響我個仔，我一定會俾個仔有選擇權同埋溝通

電影截圖@濟公
讀者投稿@flower