#ParentLicenses1705

話說小妹住公屋，房嘅位置係喺門口隔離，門口走廊係十分之應聲

之前差唔多每日都有小朋友喺走廊度玩，可能你會話：「住公屋好多人都係咁㗎啦」

但佢哋玩嘅係滑板車，由走廊嘅盡頭轆去另一邊嘅盡頭，過程中仲會尖叫，仲會轆到你會feel到地下嘅震動

我有陣時夜咗瞓，想話瞓晏少少，都會俾佢哋嘈醒；到日頭，我就喺啲轆聲同嬉戲喧鬧聲中上堂

我本身以為係小朋友嘅公公婆婆湊，所以先縱容佢哋咁，然而後來發覺係小朋友嘅媽媽都有嚟，仲陪佢哋玩

前排投訴完佢哋就消停咗一小段時間，但今日佢哋又嚟過

BB就着住BB鞋行嚟行去，bibi聲咁，十分滋擾；大啲嘅小朋友今次冇玩滑板車啦，但就不斷喺度大叫；家長就跟住佢哋，有時同佢哋一齊喺度玩

家長會同佢哋講嘢，雖然佢冇特別大聲啦，但真係好應聲，喺未投訴之前都間唔中係呢種嘈法

而家疫情，好多人要work from home或者online上堂，甚至有啲人係返夜更嘅，朝早或需要要瞓覺，你咁大聲嘈到人會唔會太冇公德心呢？

我明白，小朋友係要放下電，咁家長應該要帶佢哋去公園或者起碼落樓下玩；我都明白，可能家長未必日日得閒帶佢哋落樓玩，咁咪同小朋友解釋唔係日日都有得出去玩。小朋友係要教，唔係要縱

雖然走廊係公家嘅，冇錯你係有使用嘅權利，但起碼唔好影響到人吖。而家日日online上堂，有時要開mic present都驚佢哋會喺度嘈

玩滑板車嘅就更加應該落街玩，走廊咁多人出入，條路又窄，呢度玩一定有危險，萬一小朋友剎唔切制，整親邊個都唔好啦！

衷心希望有公德心嘅人先好生小朋友🙏🏻

讀者投稿@滑板車剋星