你包容嘅,可能就係我嘅小朋友

#ParentLicenses1279

睇到有人講到包容嘅問題,作為一個經常要帶小朋友外出嘅家長,好感慨……其實大部分香港人當見到有家長真係無奈時,都係好有同理心的

我小朋友喺第三波疫情緩和時,確診係特殊兒童,程度屬嚴重。當時佢歲半,唔識行,坐都唔穩,講嘢更加唔會,common sense欠奉

當我小朋友見到其他小朋友拍手掌時,佢會失控;人哋望住佢笑,佢又失控;我抱住佢步入餐廳門口,佢都失控……佢失控唔係發脾氣,而係會驚到顫,然後忽然歇斯底里地尖叫,尖叫嘅音頻高到我經常要食頭痛藥

情形去到最差時,佢甚至會做出啲傷害自己嘅行為——小小人仔忽然變大力士,然後我就好似個相撲手咁,要喺大街大巷用盡全身力氣包實佢,以防佢令自己受傷

未確診時,我真係好怕帶佢出街,剩係會趁佢瞓晏覺嗰半粒鐘先揹佢落街極速買啲餸;確診咗之後,就無得避,因為要帶佢去治療

等待特殊幼兒中心嘅期間,我哋要由新界出九龍做治療,費用好貴,我負擔唔到搭UBER,所以就算明知會影響到人,都要硬住頭皮搭港鐵

理解咗佢嘅情況後,我索性提早三個鐘出門。佢一開始驚,我就喺月台等佢冷靜。另外,我學咗一啲應對方法,雖然初初佢都係會不停尖叫,但途人見我不停安撫,都唔會真係鬧。有時見旁人又要忍我小朋友喊叫,又要聽我自言自語咁,我反而唔好意思,主動道歉。大部分途人都話唔緊要,有啲甚至會擔心小朋友係咪有事,我亦唔怕講出小朋友嘅情況

因為我好清楚唔係我小朋友嘅錯,我亦從不以此為卑。小朋友一直好努力改善,只係需要時間,我亦真心覺得佢好堅毅。就好似物理治療咁,治療師話佢原來會痛,但佢試過治療後企到,就好配合去做、去練

我唔會因為小朋友失控崩潰而鬧小朋友,相信如果有得揀,佢都唔想咁容易驚,驚到不停扯自己頭髮,打自己個頭……

但同時亦真誠地向受影響嘅人致歉,因為人哋無必要去承受呢啲影響。我唔會主動話俾人知小朋友係特殊兒童,因為一直唔覺得人哋要因為咁而包容,但就算無講,大部分情況都受到善意對待

我亦試過喺車站一邊安撫小朋友時,被啱啱同車嘅乘客走埋嚟用粗口鬧。好彩佢鬧兩句就走,我話「好彩」,唔係因為怕佢惡,而係因為佢好快離開而無嘈住我教小朋友,同時我又唔可以鬧返嗰位乘客,因為小朋友唔明我點解咁惡鬧對方,只會更驚。坦白講,我抱歉,唔代表人哋一定要買帳;但如果佢唔買帳,我亦唔再care,因為我個小朋友先係我一世嘅寶貝,而唔係一面之緣嘅途人

我知道自己好幸運,能夠運用充足嘅時間同資源去陪小朋友協適特殊嘅情況,有好多家長真係好難全方位配合,而且小朋友嘅進展亦因人而異,所以好多比我識教同用心嘅家長仍在默默為自己嘅寶貝付出

希望同路嘅家長們明白,途人只係過客,無必要太在意,只要我哋設身處地咁去為佢哋受到嘅影響致歉,對方願唔願意感受,已經唔係我哋可控制嘅範疇

至於唔需要面對育兒煩惱嘅人士,相信亦有自己嘅困擾 (而家邊位香港人可以無憂無慮吖),所以如果你喺街上遇過一啲小朋友嘈吵嘅騷擾,而願意包容,我想藉呢個平台衷心講句「多謝!」

因為你包容嘅,可能就係我嘅小朋友

文筆欠佳,想表達的又太多,希望各位體諒😊

讀者投稿@FM

error: