#ParentLicenses1214

請留一個淨土俾一班勇敢嘅小戰士！

近日兒童醫院有新公園開放，網上KOL及各大媒體大肆宣傳該公園設施，形容呢個公園有幾好玩，以及教大眾點樣搭車或者泊車入醫院

醫院訪客車位唔多，該宣傳令到醫院附近多了違泊車輛，嚴重地導致交通擠塞，而且該處的公共交通工具又疏落，有基層家庭等了好多班車先上到車，班車仲要應付啟德郵輪碼頭的客人

更甚是，其實好多病童長期需要到醫院覆診，或者喺醫院長期同病魔搏鬥。入得兒童醫院都唔會係普通傷風感冒，係重症、癌病、要做大手術，咁多外人為咗去玩公園，實在會構成衛生安全隱患問題。病童望住出面好多小朋友喺度嘻嘻哈哈、追追逐逐、大聲笑，反觀自己周圍都冇得去，或者受緊病魔的長期折磨，可想而知心情是如何……

難得呢個咁隔腳又咁靚嘅公園喺醫院隔離，可惜病童覆完診、洗完喉仔、落完藥、做完檢查後，眼見到咁多人，就算想落去玩陣都唔敢，就係因為怕受感染，怕會影響療程進度！

上次我同小朋友去覆診時，因為疫情關係，公園仲係關閉狀態，由2樓望落去都滿心期待等公園開返時可以落去玩一陣。人哋喺上面病到眼坦坦，期望覆完診，落去行個圈，玩陣再回家閉關，宜家被人攪到下面一地街外人，人山人海，玩到嘻嘻哈哈……你叫病童同家長情何以堪？

不在其位，不謀其政！針唔拮到肉，係唔會知痛！

小朋友無病無痛要去公園玩、要放電，我明，但係有病嘅小朋友都好需要一個公園抖一啖氣！你未照顧過重病小朋友，因而唔了解，我唔會怪你

對你嚟講，佢係一個好玩，好有新鮮感嘅公園；但對一個有病嘅小朋友嚟講，呢個公園係佢去醫院唯一可以擁有嘅歡樂

請各位高抬貴手！呃少陣LIKE！香港仲有好多好玩嘅公園！請留一個淨土俾一班勇敢嘅小戰士！

讀者投稿@激心老母