#ParentLicenses1196

最近睇到五歲女童遭親生爸爸及繼母虐殺一案，除咗慨嘆又一單無知釀成悲劇外，件事仲令我諗起我表妹

八年前，表妹18歲大咗肚結婚請我哋一家去飲。記得嗰晚一去到酒樓，我差啲以為自己去咗葡京賭場，成個場污煙漳氣，枱枱啲人唔係喺度猜枚劈酒，就玩骰盅叫囂。個場嘈到連個律師嚟到做緊證婚儀式時，班賓客都唔肯收聲，直頭無視咗台上主角，繼續忘我聚賭

好記得，其中有個姊妹坐我後面嗰枱，「壞過凱婷」咁嘅look，帶住個歲半左右嘅BB坐喺佢大髀。條?妹左手擔煙，右手好有型咁揈住個骰盅，同另一個eKids款嘅兄弟一路爆粗，一路玩大話骰

期間個BB扭計，一手掃咗粒骰仔落地，個「凱婷」就好激動咁啪枱鬧鬼個B，跟手掉咗佢落張highchair，求其隊個火機同碟花生畀佢，由得佢自生自滅，自己就繼續同eKids搖骰盅

我呀媽見到就忍唔到口同個「凱婷」講：「小朋友咁細，唔好俾花生佢食呀。」

點知呀「凱婷」就即刻擺出一副「瞓啦柒頭」咁嘅咀臉，睥行我媽，再同個B講：「係咪衰吖你，累到你老母被人串喇！」

之後成晚，佢都不斷睥睥貢，仲有意無意咁噴啲煙嚟我哋嗰枱度，而個BB就綁咗喺張BB櫈度，一邊食住二手煙，一邊揸住個奶樽自隊。我除咗同情呢個年輕媽媽嘅BB之外，我無嘢好講

朋友，從來都係物以類聚，我表妹其實都唔好得佢姊妹好多。佢陀住BB時，到生咗後，都一樣係煙不離手；到佢女一滿月，已經急不及待Facebook出Po劈酒夜蒲慶祝

但你不得不佩服，腦殘嘅人副生殖器官總是異常健全。表妹今年26歲，已經係三子之母，但三個小朋友都唔同老豆，問你死未

佢嗰啲動地驚天愛撚過嘅故事，呢度我就唔詳述啦，但佢育兒嘅理論同實踐確實令我大開眼界

記得有幾年家族團拜，佢啲仔女例牌嘈到拆天又周圍搞搞陣，最後被其他親戚投訴，佢問都唔問吓，就眾目睽睽下兜巴星晒三個仔女；又見過佢不滿個仔駁佢咀，就用透明膠紙黐實佢仔張咀迫佢收聲；仲試過佢打打吓牌，嫌個女嘈到佢輸錢，?起支煙頭就咁對住個女隻手，半講笑咁嚇佢話：「再嘈就辣落去」；我亦聽過佢恐嚇個女話佢再曳就send佢無著衫啲相俾另一個表哥……唉，真心希望唔係真啦

其實無知都唔緊要，但表妹真心覺得自己好醒。表妹因為生咗三個而三個都未俾佢湊死，所以自覺係育兒專家，仲成日周圍教其他人點湊仔

佢經常發表好多偉論，經典中嘅經典如：教大家去老麥食早晨時，攞多包鹽放喺手袋，遇上小朋友去公園玩受傷又無得消毒時，就灑啲鹽落個傷口度殺菌；佢又教人千祈唔好俾小朋友食橙，因為食橙會面黃同皮膚黑喎；有次，佢仲特登求咗支符水俾我家姐，話佢仔BB時生濕疹敷完好返，超work，點知我哋一打開樽嘢，一陣酒味，正常人都唔敢俾BB用囉

最大獲係佢呢期好似上咗個zoom興趣班，然後就衝出去幫佢個閨蜜做陪月，仲自誇貴為三子之母，湊B技巧一定好過出面啲濕鳩金牌陪月，又問班親戚有無生意介紹佢……

我無心歧視年輕媽媽，但偏偏好多時候社會上一啲虐兒同因疏忽照顧以致兒童死亡嘅案件，都係來自呢啲心智未成熟、常識欠奉、價值觀錯晒、生活混亂、自己都未識照顧好自己就急急做咗人父母嘅年輕家庭

最可悲嘅係，縱然佢哋犯下大錯，但往往連自己錯喺邊都未有能力理解，仲要將錯就錯傳俾無辜嘅下一代

最後，都係嗰句，戴返個套先搞嘢啦唔該

讀者投稿@老表