#ParentLicenses2352

歡迎收睇我家嘅故事

有時我都諗唔明點解父母咁錫仔，就因為可以將個姓延續落去，延續埋俾個孫個孫個孫？因為丁權？因為有屋？總之我父母縱到阿哥變廢人啦，重好刻薄個女

由細到大阿哥唔使做任何嘢，家務唔使做，書包老母執，誇張到飯都要人餵。老豆搵到錢送咗部PSP俾阿哥（當然我係冇份玩），日打夜打，咩都唔，功課都唔做。食晚飯都要拎住部機係咁打，我媽就一羹一羹咁餵佢食，好讓佢可以順利過關

你以為我哥係真殘廢智障？唔好意思，佢有正常身體，不論喺屋企定學校都係蝦蝦霸霸

相對地，我做乜都係錯。例如拖地稍為重有少少塵都被人打一身，啲碗抹唔乾又打，個廢柴阿哥食餅食到成地碎又唔執，搞到我被人話掃地唔乾淨，照打

直到我大個啲，終忍唔住問父母：「點解阿哥咩都唔使做，工又唔使返，坐喺屋企戇撚鳩鳩咁過日子？」

佢哋話：「你阿哥使乜返工呀？佢有丁有得起屋；你做女要學識所有家頭細務，嫁出去先有人要！好心就唔好咁計較！」

喔！原來覺得我計較。所以我決定要諗辦法搵多啲錢搬出去住

大概喺五六年前，條廢柴終於肯返工，可能係條女迫佢。佢公司離屋企五個字路程，都係屬同一區，佢夠膽死日日叫老豆老母送飯俾佢，即使出面橫風橫雨都要送，而佢哋係非常樂意。今次我唔出聲，我認為呢啲係佢哋一直以來自己攞嚟

三年前，我哥同條女齊齊搬走過二人世界，而兩年前我都搬走埋，以為搬到遠一遠，佢哋唔會再搵我做嘢

近年可以出國旅行，有日阿哥猛咁打電話叫我返娘家搵喼俾佢。我話：「你去旅行又唔係我去旅行，憑咩要幫你條廢柴搵？你新居就喺屋企對面，你有手有腳唔識返去攞㗎？」

Cut咗線後，第日收到電話，老豆入咗醫院。原來阿哥使唔到我做嘢，就搵兩件老嘢埋手。當時父母喺第二度食飯，阿哥急call叫佢哋返屋企搵喼，佢哋就嗱嗱臨衝返屋企搵。點知喺屋企花園個玻璃屋度，老豆擔梯搵嘢跌咗落嚟扽親屎忽

阿哥第三第四日係咁打嚟叫我找醫院數，叫我接走老豆，然後我改咗電話號碼，你哋會唔會覺得我好衰？

圖片來源@竊聽風雲3
讀者投稿@妹