#ParentLicenses1473

我哋哩間小學喺區內算係比較唔太谷嘅學校，做過好多資料搜集、問埋喺度讀緊嘅小朋友，確定咗啲小朋友係讀得開心同唔辛苦嘅，先揀呢間學校，相信好多媽媽都因為咁先揀呢間小學——今年我小朋友二年班

開學後嘅兩星期，日日大約4至5樣功課左右，上星期五有6樣功課。我諗應該係老師覺得星期六日可以分開做，所以俾多咗樣啫

點知……

今日星期一有7樣功課！！

簡直對我哩啲為咗少功課而揀學校嘅家長嚟講，當然由心入面X出嚟

轉頭喺小二WhatsApp群組入面就有個媽媽出聲

A媽媽：「今日我哋班有7樣功課，係咪畀得太多？」

B媽媽即刻回覆咗兩段錄音，大約係講：「覺得一啲都唔多功課，自己兩個小朋友今年轉校嚟哩度，舊校日日超過10樣功課，日日抄寫，做到2~3點，晚晚喊住都係咁做。所以覺得依家7樣功課係已經好正常，一啲都唔多，直情係少添，係比正常嘅少」

第二段錄音就話：「自己小朋友喺學校已經做咗好多功課，係老師講功課嘅時候一齊做嘅」

再話係A媽媽個小朋友上堂無聽書、發夢，所以喺學校無做到，搞到要拎返屋企先做，所以話多功課

B媽媽又講：「自己小朋友讀基礎組，照數嘅話今日有9樣功課，多過你哋嗰班添，不如同老師/社工傾下，睇下小朋友有咩問題？」

其實，B媽媽個小朋友同A媽媽個小朋友係唔同班嘅，B小朋友讀嘅基礎組係學習能力較弱嘅一班。因為能力較弱，所以老師會同佢哋一齊做功課

而A小朋友讀嘅係最叻嗰班（即係我女嗰班XD），就算老師講功課都係講一兩條，其他自己做

B媽媽你憑咩話人哋小朋友上堂發夢無聽書呢？人哋個小朋友發夢嘅話就唔會讀到呢班喇

A媽媽覆：「真係無話可說，當年我讀小學放12:30，做完功課仲可以睇閃電傳真機，而家咁樣竟然係已經叫正常？」

跟住家教會主席就出聲：「明白家長因為剛開始開學兩個星期，尤其是係因為小朋友係小二，覺得家課係太多的話，係可以同班主任佢反映，咁睇下班主任喺了解哩個過程中，小朋友係喺邊方面有困難」

我即刻唔敢出聲，因之前聽高年級家長講哩個家教會主席會將喺群組睇到嘅嘢「反映」返畀學校聽，叫我小心啲講嘢，點「反映」我就唔知喇，所以我無出聲

其實都幾慘，家長提出覺得小朋友太多功課做，竟然係被責怪、係被指小朋友有問題、叫小朋友搵社工傾下

下？嚟得讀哩間學校都係想小朋友唔好咁辛苦啫，初心喺邊？咩叫正常？點定義正常？用10樣功課同7樣比所以叫正常？

根本香港教育制度就唔正常，而我哋哩啲追求小朋友愉快童年嘅家長就變成有問題嘅一群

唔通真係要移民咩？又點放得低其他屋企人？讀國際學校？哪有錢？

我愛香港，偏偏要睇住香港慢慢死亡，又無能為力

A媽媽，我企你嗰邊㗎，不過我唔敢出聲

大家見字飲……吖唔係，見字做功課喇！加油！

讀者投稿@喪做