#ParentLicenses2120

首先要介紹一下，呢個教育戲劇藝術中心有唔同類型嘅課堂。我選擇嘅係英文音樂劇，主打三至六歲，以及七至十六歲小朋友，但眼見多數係幼稚園小朋友參加，其次有小量比較大嘅小朋友。整個課程安排每星期一堂，合共上兩個月，然後就會表演

於表演當日，相信每位家長都滿心歡喜期待自己小朋友嘅演出，當然心入面都有準備未必會表演得好完美。然而，係估唔到表演嘅安排會咁一塌糊塗同不知所謂

當日佢哋官方公布嘅行程如下：
總綵排時間：3:30pm-5:30pm
用膳時間：5:30pm-6:30pm
表演集合時間：6:30pm
演出及頒獎時間：8:00pm-10:00pm

下午三時半，小朋友到達上環文娛中心先作綵排。兩小時後，家長會接返小朋友，有一個小時休息時間。表演計畫到晚上十點，相信家長都會先俾小朋友食飽再表演

八點開始入座，十多分鐘後表演開始。表演分成兩個音樂劇，A組小朋友表演六十分鐘，正常預算B組小朋友都會表演六十分鐘就完結，唔知點解最後B組小朋友嘅表演居然長達一百一十分鐘

當時表演完已經係晚上十時五十分左右，在座每一位家長都已經開始表現得好攰，唔敢想像喺舞台上面嘅小朋友又肚餓又眼瞓係咩感受

不過舞台嘅安排的確未必可以完全控制，我哋都理解，所以一直繼續等待。因為最後重有一項所有小朋友嘅頒獎環節。既然辛苦綵排咗咁耐，個人覺得頒獎呢一刻對小朋友好重要，所以大家都無早走，唔希望小朋友會錯過成果嘅一刻

首先頒獎嘅時候佢哋準備咗一對獎盃，逐個小朋友行出嚟接受領獎。頒咗約十幾個左右，然後頒獎嘅女士就講咗句：「佢哋喺我哋度讀咗好多年……（下刪冗長內容），由於時間嘅關係都已經好晏，其他小朋友就直接派證書俾佢哋啦！」

冇錯，係證書，然之後個個就好似收傳單咁樣，接咗工作人員「傳」俾佢哋嘅證書

大佬呀，臨時演員都係演員

咩啊？而家即係課得多金就有獎盃？剩係讀第一期嘅只得證書？我點向小朋友解釋大家一齊咁努力表演，人哋有獎杯，但佢得獎狀啊？

我親眼見到冇獎盃嘅小朋友好失落咁望住攞獎嘅小朋友。點解呀？我冇交學費咩？點解要令佢哋表演完之後咁唔開心？

如果呢個係一個比賽，我個仔佢表現唔算好，因而冇獎拎，我反而可以接受。但呢個好似係一個舞台表演啊？點解要令佢有咁嘅感受啊？我身旁已經唔止一班家長覺得不滿。家長期待咗咁耐，到最後係換來小朋友捱餓、攰到喊、自尊心嘅挫敗

然而，呢一刻大家都已經唔得閒去嬲，因為要落去接返小朋友，嗰陣時已經係晚上十一點幾，班小朋友重要未食嘢。大家即刻喺附近搵嘢食俾小朋友，然後先再返屋企，到最後返到屋企已經係一點

我唔能夠理解，一個作為教育嘅機構，點解可以完全唔企喺小朋友嘅感受考慮？純粹剩係為咗賺錢？

另外，於家長接小朋友嘅環節，可能因為家長們已經太攰，又知道小朋友好辛苦，大家都蜂擁而上去搶小朋友走。從中亦可見主辦佢哋係完全冇安排好，啲小朋友行出去就俾人攞走，如果有心嘅話，好容易就可以接走其他小朋友

如果大家真係考慮俾小朋友感受舞台表演，希望唔好揀中呢間教育戲劇藝術中心

文章來源：讀者投稿@Y太