小朋友都話做人好辛苦

#ParentLicenses1888

呢段內容純粹想家長正視下自己子女的心理情況,不喜勿插🙏🙏🙇🙇

我係一位私人補習老師,有位小朋友每星期都會上來我家補習兩三日左右。呢位小朋友都好乖、醒目,佢讀緊一所尚算出名的小學

屈指一算,呢位小朋友跟咗我補習都幾年,我同個學生關係算幾好,但同佢家長就一般,因佢媽媽有時會冇乜禮貌

疫情嚴重嗰排因為改用zoom幫佢補習,有次因為我跟對上一節課的小朋友講多兩句而遲咗5分鐘左右,佢媽媽已經在whatsapp頗沒禮貌地咁問我:「去咗邊,做乜仲未見人?」

一般家長未見我入都會客氣咁whatsapp問:「未見老師,我們已在zoom等緊😊」之類說話,不過呢啲都唔係重點

事情係咁嘅,有一次補習,個小朋友在差不多落堂時同我講,佢將開始要應付呈分試

🧒學生
👨‍🏫我

🧒:「唉……來緊要應付呈分試,我好驚」
👨‍🏫:「你成績一向都唔差,唔使驚喎」

🧒:「唔係呀,我唔係驚成績,係好驚我媽咪呀。其實自從我開始高年班,佢就開始好緊張我啲成績」
👨‍🏫:「咁緊張好正常吖,因為要準備升中嘛」

🧒:「唉……佢嗰種緊張係好恐怖。佢除了緊張我成績外,仲會好緊張其他同學嘅成績。每次測驗考試,都會關心埋其他同學嘅分數,例如我xx科有92分,如果佢聽到乜乜同學94分,佢就會鬧我,問我做乜會做錯,搞到低分過xx同學。鬧嘅過程唔係一兩句咁簡單」

👨‍🏫(我開玩笑咁講,唔係鼓勵佢騙媽媽):「咁會唔會你試下求其講個同學仔的分數俾佢知就算?低你一兩分咁呢?」

🧒:「哎呀!唔得啦!我媽咪除了問我,佢重會在家長group入面留意其他同學分數,遲早都會知呀」

🧒:「重有,佢表面上話就話唔好比較分數,但佢暗地不停留意其他同學分數,尤其在我分數比其他同學低時。我媽咪一般在group裡唔多出聲,但擰轉頭就鬧我」

🧒:「我真係好唔開心,好大壓力。總之現在一關於成績問題,佢就隨時好緊張同鬧我」

👨‍🏫:「咁老師有咩可以幫到你?要唔要幫你同媽媽傾下?」
🧒:「嘩!千祈唔好呀!你改變唔到佢,重會鬧我講呢啲嘢俾你聽,實鬧死我。你肯聽下我講呢啲已經好好,因為身邊冇一個人會明我同可以講心事俾佢知」

👨‍🏫:「如果你覺得老師在你唔開心時,花少少時間聽你講下,你會舒服啲,老師願意聽,但先要完成每堂補習內容先。(安慰佢)不過你都要明白你媽媽可能太擔心你前途,所以有呢個情況,你都唔好怪佢」
🧒:「我冇怪佢,不過見佢成日突然好緊張,佢搞到我好辛苦,所以有時會瞓得唔好半夜會醒,有時好難先瞓得著,成日好似好多嘢擔心咁」

👨‍🏫(聽完呢句,我個心嗱咗一下,10歲未夠的人仔就受失眠影響😔):「若你真係好難受,你都要嘗試將你感受講返俾你媽媽知,點都好過你自己屈喺心裡」
🧒:「唉……我唔知呀,你應承我真係唔好同佢講呀!」

👨‍🏫:「知道🙂」
然後就夠鐘落堂

往後每隔一兩堂,呢位小朋友都大約會同我講佢在家裡遇到嘅唔開心嘅事俾我知。不過我只能安慰呢位小朋友,冇咩實際事情可以幫到佢。「聆聽」都算係幫下佢嘅方法之一吧😔

明白小朋友於高小時,家長難免開始會緊張學業,但都不要將小朋友太多比較或定位得太高,快樂童年對小朋友身心發展都很重要的

讀者投稿@噹噹

error: