#ParentLicenses2121

短短一星期，睇到兩篇寫住有人濫用某主題公園嘅援助咭

我家小孩今年十七歲了，患有嚴重自閉症，唔識講嘢。幸運地，喺佢十五歲時叫做自理都還可以

一開始，其實某主題公園係並無呢一種殘疾人士援助咭，於我印象中有呢張咭時，好似只係呢十年內嘅事

以前帶仔仔入去，排隊係如同打仗，不過就算係返學、出街食飯，對我哋嚟講都係恆常挑戰，但我哋都仍然好感恩，因為我嘅小朋友從來都唔會傷害同打人

然而，問題係喺當等候時間長時，仔仔會打自己，甚至試過頭撞向牆，又試過喺地鐵因為坐得耐，佢會突然尖叫

曾聽過無數次嘅冷言冷語，由起初嘅介意，到左耳入右耳出，難道要我小朋友一世都留喺屋企嗎？對佢哋有效嘅治療，其實係要出街同埋接觸唔同事物，對佢哋成長都十分有幫助。所以我通常會喺非繁忙時間，帶小朋友出去呼吸下、跑下、感受下

講返主題公園，仔仔最鐘意《小小世界》以前嘅車仔（已拆），主要都係玩啲唔太嘈嘅機動遊戲。當某主題公園出咗張援助咭，已經對我哋一班SEN嘅小朋友真係好大幫助，輪候時間大大減少。雖然每次來到只可玩兩三樣遊戲，因為無論行、去洗手間、食嘢等等，都無可奈何地佔去咗我哋好多嘅時間

特殊小朋友從平常中就咁睇未必知佢係特殊，我哋呢一班家長從來都唔會去濫用呢啲援助，可以排到隊嘅都一定會俾佢試排，因為都係訓練嘅一環

眼見有父母竟然因為貪方便而攞呢一類援助咭，請問你哋心中會唔會覺得內疚？因為你哋嘅自私，有可能會剝奪我哋需要嘅嘢。其實你哋知唔知道，有時候去爭取一啲設施、一啲援助，我哋需要用幾多嘅時間、幾多嘅資料、幾多嘅數據來去申請？而且申請重要等，甚至喺等嘅時間只係讓前人申請後人乘涼而已，但我哋都會為將來去爭取。

因為你哋嘅自私，搞到我哋辛辛苦苦得到嘅需要而無咗，你哋唔會內疚嗎？或需要嘅嘢一改再改，改到唔方便咗，你哋又會點諗？

難道你哋覺得我哋呢班家長唔想要一個正正常常嘅小朋友？我想講，此乃非必然。但我好感恩，最少我哋活得無愧於心，最少我哋知咩叫身教、道德品格

當我哋一班SEN嘅父母離世時，遺下我哋嘅小朋友時，比較無咁嚴重嘅都可以自力更新得到，嚴重嘅只能喺院舍終老。我哋只係希望喺有生之年，可以帶佢地盡量感受呢個世界。真心懇求各位，為你哋下一代做下好榜樣，唔好濫用得來不易嘅援助🙏🏻

雖未必同生仔要考牌有關，但都想俾大家知道SEN嘅小朋友，甚至其他殘疾人士，都真係好好好需要呢啲設施同援助，謝謝🙏🏻

圖片來源@功夫足球
讀者投稿@SEN小孩家長