#ParentLicenses0776

琴日5點收到阿媽來電，一來就問我食咗飯未。心諗，咩食咗飯未呢？冇時冇候，5點食咩飯呢？原來佢以為我仲係逢星期四例休，以為我仲在家，但我其實剛轉咗工，連續一星期忙到心跳和呼吸好急促

佢話：「阿婆走咗，96歲。」
我回應話，「哦，96歲係好叻。」
佢叫我：「過幾日去殯儀館拜一下。」
我話：「要考試，諗下去唔去先。」（我係好無情）

家人四口，已四散，在我33歲後，父母離異，細佬離家出走也多年，渺無音訊，而我自己32歲都搬咗出嚟一個人住

講真，家人緣薄

我唔鍾意我父母。父親在外包二奶，已有孽子。自我揭發後，我已和佢不相往來；阿媽性格懦弱，郁啲就呢度痛、果度攰，3x歲已經唔再工作。外人，包括我，只是覺得佢係想做少奶奶。奈何，佢咩都唔識，又唔想學。帶佢返教會，佢唔想。阿爸在我們兒時話想抽居屋，佢又係話唔想搬

總之，由細到大，我阿媽係一個不思長進嘅人——老公出去包二奶，佢只顧在家喊，又唔擴闊自己生活圈子；成日問我攞家用，而家中一直只有我和阿爸會俾家用。我自己都睇唔起佢

我自己都4x歲了，自己供自己讀大學，讀完幾個學位，一分錢學費都冇問過屋企拎，但家用我照俾

我搬屋，亦冇問過屋企拎一蚊半毫。最近裝修，因為短租，好難搵地方住，唯有嚐試問阿媽。佢都驚相見好同住難，拒絕咗。最後，我終於搵到地方容納一人兩貓，過緊旅館生活

繼續執屋，聽到阿媽話個雪櫃生銹，我二話不說，將本來留嚟己用嘅雪櫃話送去俾佢。我話叫車，佢實物都未睇，就驚個雪櫃冰室細。一個人住，我夠用，點解佢就會唔夠呢？又係亂咁買嘢囉

佢年屆60，左嫌右嫌，都已經冇收入啦，仲嫌三嫌四。我慶幸冇同佢住

佢養咗我20年，我已養返佢20年。一生兒女身份，已經冇覺得欠咗佢

如果佢大限已到，我諗，我大概都一樣係：「哦，xx歲已經好叻。」

見到父母咁，我仍單身

讀者投稿@.

#ParentLicenses0778

其實我係女的

父親在我10歲左右，因為一個食飯手勢問題，叫我不如去做雞，成張摺櫈飛埋嚟。其實，想真啲，至今對男性或多或少有戒心，或許就因為這件事

細佬讀唔成書，但去咗大公司做學徒。佢喜歡佢嘅工作，但從來唔俾家用，阿媽剩係問我攞家用——點解？因為怕細佬發脾氣。細佬兒時犯過事，曾被警司警戒過，返到屋企，父母仍然冇事發生咁

我想讀大學時，阿爸話：「女仔唔洗讀咁多書。」阿媽一句：「邊有咁多錢俾你讀大學。」但卻在我找到工，半工讀後，不停問我拎家用

點解蝦我係女？

書，你唔支持我讀大學，我就自己搞掂；
屋，你唔想住大啲，咁我自己儲錢自己買樓自己供，死慳死抵，只讀書、做兼職、少外遊、10蚊米粉點心當午餐；
家用，我照俾，但呢個家，點解個女會成為被欺壓對象？我今時今日做到管理層，月入夠養一家，樓都就快供完，我要多謝嘅係父母？

我頂唔順，我搬出嚟住。我搬咗出嚟住之後，隔一年，細佬都搬走咗，冇留聯絡。我試過打去佢公司，因為公司太大，基於私隱，無法尋親。登報？我又唔捨得花咁大筆錢。值咩？唔識講

阿爸在鄉下係大仔，是孝子，但重男輕女。阿爸被我揭發佢申請個孽子落嚟香港後，我覺得所有家庭價值觀都變晒

佢仲係孝子咩？我存疑；佢係咪好父親？一定唔係。佢解釋點解申請佢落嚟：因為知佢係仔，如果係女就唔申請落嚟

佢無家教，所以會叫個女去做雞；阿媽唔識教，所以只係識得喊

或許，就是這樣的家庭環境，做就咗今天的我

我係咪應該多謝個天俾佢哋生我唔係仔而係女？如果我係仔，我個命運係咪會好唔同呢？

如果佢因為個孽子係仔先申請落嚟香港，咁點解一開始唔養好第一個仔？因為想人生重來？為自己補鑊？自我補足？

不停生仔就可以reset？養好第二個仔就可以彌補教唔好第一個仔嘅遺憾？咁個大女，我呢？我仲需要多謝兩位嗎？

我會多謝我自己。多謝個天咁待薄我，造就咗一個咁鍾意認叻扮可憐，但怕結婚怕家庭嘅我。

人強，因為乜都冇，要靠自己由零開始去建立

父母們，如果想你哋仔女獨立和強，記得要待薄仔女，但千祈唔好期望關係會融洽——自己取捨吧

讀者投稿@.