#ParentLicenses2242

話說，我有個好朋友，識咗好多年好friend。大家各自嘅仔都係幼稚園年紀，啱key啱玩，會成日約埋出街玩，或者去大家屋企玩。然而，愈一齊玩得多，就愈發現到問題

例子一

兩個小朋友一玩玩具就成地都係
平時教開自己個仔，玩完一款收好一款，先再拎其他出來玩。阿仔自己一個玩時係做到嘅，但當兩個小朋友一齊玩，就成地都係玩具，一齊就失控

例子二

一叫執嘢，佢小朋友就即刻行開
成地都係玩具都算，試過再加多幾個小朋友一齊玩，當一叫執嘢，乖仔乖女嘅即刻密密執，而嗰位小朋友就即刻行開，離開玩玩具嘅範圍，行去第二度，或者走去搵阿爸阿媽

例子三

呢位小朋友每次來我嚟屋企玩完，總會有玩具被玩爛或被破壞
有啲要砌嘅玩具，會被拆散曬，之後仙女散花咁一地都係。其實唔係介意啲玩具被整爛，講真，而家嘅小朋友物質好豐富，玩具數量一定唔少，唔小心整爛嘅唔緊要，但都會教小朋友要珍惜玩具，唔可以特登整爛嘢，爛咗就唔會再買，唔關價錢嘅問題

就算佢父母當刻睇到都好少出聲阻止自己個仔，或者都係話佢一句而已，而小朋友理所當然地左耳入右耳出。我哋有時都會去佢哋屋企玩，睇到佢喺自己屋企嘅話，玩法都差唔多，都係一地都係。另外，一叫執嘢，佢就開始行行企企，會話「好累呀」「好眼瞓呀」等等，跟住就由大人去幫手收拾殘局，不過佢就唔會整爛佢自己嘅玩具

想問下大家，當刻會唔會即時出聲話人哋個小朋友呢？定係做人阿媽嘅，永遠都只係睇到人哋個仔嘅問題，睇唔到自己個仔嘅問題呢？

講真，如果其他大人見到我仔做緊啲唔啱嘅嘢而出聲話我仔，我絕對OK，唔會介意人哋話我個仔，因為可能我都未必次次都望到，但我望到嘅話一定會即時出聲阻止，事後再同佢傾計recall返今日咁咁咁，係唔啱㗎喎，諸如此類。因為小朋友重係細，要大人教，要大人提，要俾小朋友知道，原來有大人睇到，知道你做緊曳嘢

不過若然我干涉人哋我就怕，怕出聲話人哋個仔，人哋父母會唔鍾意

圖片來源@張國榮 – 無心睡眠
讀者投稿@直升機家長