#ParentLicenses2262

我屋企兩個小朋友（四及六歲）一直有會所安排嘅老師喺九龍區某私人屋苑泳池教游水

話說今晚，我喺泳池旁邊嘅沙灘椅睇書，我嘅四歲小朋友就喺泳池跟老師學緊游水

突然間，我聽到老師好大聲喝止另一個大約九至十歲嘅女仔：「喂，唔該你唔好再潑水過嚟，呢個小朋友嚟㗎你見唔到㗎？」

老師續罵：「我忍咗你幾次，次次都係吼佢喺池邊呼吸完上水，就用手撥水過嚟。開頭我當你唔小心，但你擺明係特登！」

事發距離離我張沙灘椅有啲遠，同埋我睇緊書，所以冇留意泳池情況

我見到個女仔同佢阿哥一齊，阿哥即刻避開現場去室內泳池，而個女仔大大聲咁駁返咀：「我冇喎！我冇！」

老師隨即質問：「你家長呢？冇大人陪你嚟游水？」

未幾，過咗大約十秒，有個後生嘅男士施施然咁游過嚟

老師就問佢：「你係咪佢家長？」

男士：「我係」

老師遂一五一十將剛才嘅過程講返俾佢聽，但個老竇一副不以為然嘅樣子，係咁話：「你搵水撥返佢啱㗎喇」

喺大半個鐘頭之前，我先生都喺現場。後來我落樓同爸爸池邊交接，準備接小朋友落堂。原來呢位女孩子嘅細妹（大約六七歲）都有前科，喺池邊踢其他泳客嘅雜物落泳池。我老公見到喝住佢，而個妹妹先奸笑咁離開

救生員話其實呢三兄妹近排暑假成日夜晚落嚟，佢哋唔係亂跳水，就係做其他行為騷擾其他泳客。阿爸唔理，而救生員或者其他泳客出聲嘅話，排行中間嗰個女就永遠聲大夾惡咁話「我冇」，不過遇到惡啲嘅就會自己收聲

回想個老竇質素咁樣，所以佢嗰三個小朋友咪咁囉！我下一堂會睇實，試吓再騷擾我兩個小朋友，我一定會出聲！

讀者投稿@MotherA