#ParentLicenses1415

如果一位母親嘅身教係有如以下故事咁樣嘅，真係令人替哩兩位未來主人翁、未來嘅社會棟樑擔心，當長大後唔知會變好、變差定係仲衰過阿媽??‍♂️

事源係咁，某樂園最近搞緊個抽獎活動，類似《一番賞》之類，$100有3樣嘢。咁官方今次個抽獎活動有分A-E獎，A-C就係公仔或咕?，D-E就係活動期嘅特別Pin。相信如果你有玩或者有了解嘅都知有一啲人目標係想要特別Pin

玩得抽獎絕對係講彩數，總會有人中咗唔想要嘅獎品，自然就會睇下其他人有無中到自己想要嘅獎品，再試下同人交換

我比較鍾意Pin多過公仔，就一路食花生（睇人抽獎）湊熱鬧，一路睇下有無人想交換獎品。咁啱終於出現一行三人（媽媽+兩個小朋友）嚟玩，抽中咗我想要嘅Pin

我（手頭上係咕?）問佢哋：「想唔想交換？」

個小妹妹想要我袋內嘅咕?，佢阿媽喺正佢隔離，無理由唔知小妹妹係自願想以物換物

阿媽問小妹妹：「想用手上嘅邊個（特別Pin / 普通Pin）嚟換？」

妹妹一下就抱緊個咕?，無回答佢媽媽。既然佢個女揀咗佢鍾意嘅某款咕?，我就自己揀我要想Pin作為交換。過程中，妹妹開心，阿媽又無表示有問題，咁我就當然認為已經等於完成交易

佢哋就行開繼續睇下舖頭睇下嘢啩，我就有幾分鐘企定定繼續同朋友吹水、食花生湊熱鬧

完成交換後20-30分鐘左右，留意到剛才個阿媽喺舖內想搵返我。原來係佢個女話想要返個Pin，唔要個咕?，又想要公仔，三心兩意咁

本著交易已完成，當初雙方同意咕?交換pin，過程又無出現問題，本人梗係唔會再交換返當無事一樣

個阿媽（唔係個女）好堅持想要公仔，但我手上無，咁睇下周圍嘅人會唔會有得交換，嘗試幫佢問下。可惜問咗一陣都無結果，唯有自己蝕一粒Pin再幫幫佢，睇下有冇人肯用公仔換我粒Pin

經過一段時間都無人換，睇嚟都無咩可能換到，咁我盡咗力嘅情況下，就答個阿媽：「幫你唔到」

個阿媽自己行開咗，可能佢自己去問啩

事後聽返在場人士講，個阿媽係「可能」見到有其他公仔得意啲、靚啲嘅時候，就係咁鬧個仔 / 女（鬧咩唔知，但應該關於個獎品嘅事)，先至開始搵我

我由朝玩到晏，掛住玩同埋等同人交換，終於得閒去解手。當解完手出返嚟，隻癲狗（容許我咁形容，因為個阿媽真係好癲）衝埋嚟，又無戴好口罩，話我：「做乜走佬？！你一定要俾返粒Pin我！」

個阿媽屈我搶佢嘢再跟手閃人，又話佢無應承交換，再話我蝦細路，佢聲稱睇唔到當時嘅過程

因為佢真係咆哮咁講出嚟，就好似某國大叫watch out咁，完全聽唔到佢話語內容係咩

個阿媽情緒激動，我就嘗試叫佢：「冷靜啲，慢慢講」

唔講由自可，一講佢更加激動，直頭除晒口罩，步步迫近，又咆哮過，口沫橫飛

係咁話：「我大把時間慢慢玩」「我搵律師告你偷/搶我嘢，我有朋友識法律」

當時佢又真係有打俾個朋友話：「你話告得我就告」「我要化驗指紋證明粒Pin係我個小朋友」

當時太恐怖，佢用恐嚇嘅語氣講「有大把時間同你玩」，行為動作又唔冷靜，我受驚嚇，就搵保安控制下佢

喺保安調停嘅過程中，佢同朋友講電話，內容似話自己識好多人，又乜又物咁……

事情發展到最後，我怕＿咗佢，點知佢係黑定精神有問題，就迫於無奈地換返俾佢

重點1：小朋友鍾意個咕?，係發自內心甘願同我換嘅

重點2：個媽媽一直喺小朋友身邊，有交流，佢自己仲問個女想要邊款咕?，我從來都無逼或者蝦個小朋友。如果阿媽真係唔想換咕?，想要公仔，咁點解要問妹妹佢想要邊款咕?？

重點3：在場有公仔實物可以睇到，點解要完成交換後先反口覆舌，仲要過咗咁耐先話唔鍾意或者唔想要？

重點4：喺完成交易後，先行離開嘅係佢哋，並唔存在佢所講嘅「搶咗粒Pin走咗去」

因為發生咁嘅事，令我未完成今日所定嘅目標，所以都係返去舖頭再睇睇

當時在場識嘅職員就話聽到個媽媽一直鬧個小朋友：「點解唔要交換公仔，換個咕?做乜？！」blahblahblah……其實明明小朋友就好鍾意

聽完都覺得，一係阿媽想要公仔，借小朋友過橋?；一係事後個阿媽發現特別Pin價值較高，就先想要返

再同職員傾，佢都話當時見到係小妹妹自己喺我個大袋揀咕?，並完全無強迫過個細路女

我本身就記性比較差，神經比較敏感，少少事都會嚇一嚇，所以喺三魂唔見七魄下打哩個故事，細節就唔太記得，但大概發生嘅事情都打晒出嚟，真心無偏袒自己嗰邊，但肯定對方真係無一樣係正確！

何為身教？阿媽都反口覆舌，試問點教小朋友？哩位阿媽嘅媽媽，又係點教女？教到咁，教到個女做咗人哋阿媽都仲係咁?

第一次投稿就長文，sorry for 1999??‍♂️

讀者投稿@無妄之災