#ParentLicenses2128

剛過去的復活節假期，由於比較多人趁長假期外遊，相比較前幾年，都唔叫多人留喺香港消費

假期期間其中一晚，我哋帶住小朋友去九龍一間餐廳食飯，撳飛等一張中枱。等咗十五分鐘都只叫咗八張細枱，而中枱同大枱都無叫過

於等待過程中，我哋小朋友都不斷嗌肚餓，咁我哋就同小朋友講要忍耐、要排隊。突然有一個好熟口面嘅小朋友（下稱「童星」）坐喺我哋旁邊睇電話，本身我都無乜為意佢，只抬頭望下佢，才發現佢幾熟口面而已

佢媽媽（下稱「星媽」）突然呼叫佢，然後同佢咬耳仔。半分鐘後，童星走返嚟同星媽講：「佢話幫我哋執張枱，下張俾我哋呀」

就係呢句說話引起我留意佢，我同同行嘅朋友傾傾下，始發現佢係某電視劇嘅童星

再過幾分鐘後，星媽又同童星咬耳仔，然後童星又喺我旁邊離開座位走去櫃檯問嘢。佢返嚟又同星媽講：「執埋枱就得啦」

聽畢，星媽好開心咁走去正門口企定定等

大約又經過一分鐘後，終於叫到我哋張中枱飛，我哋就行去正門展示張飛俾接待員睇，當時星媽一行人企咗喺我哋後面

個接待員忽然煞有介事地同我哋講：「你哋介唔介意先讓個卡位四人枱俾「佢哋」五位？」

接待員向我哋解釋一大輪點解要我哋讓，又應承下張俾返我哋。然而，我眼見無一張枱係已經食完，頂多只有幾張叫食緊一半

我隨即問個接待員：「大概要等多幾耐？」

接待員無俾確實時間，只係應承下張俾返我哋。當時我哋已經等咗廿多分鐘以上，小朋友們已經由等位嗌餓嗌咗好耐，所以我哋拒絕餐廳安排

最後，我哋堅持入座卡位。經我觀察下，餐廳所謂下一張枱已經係大約二十分鐘後。直到我哋埋單時，星媽一行人都有入座到一張真正嘅六人枱

大家都有小朋友，我明白大家都驚小朋友餓親，但請用身教教小朋友如何守規則，我絕不苟同咁細個就教會小朋友行捷徑

另外，如果真心認為自己小朋友做咗童星受大眾認識，咁就更應該教佢一個公眾人物要多注意自己嘅言行舉止

讀者投稿@小薯