#ParentLicenses1874

係咁嘅，上星期同屋企人行街，入咗間麵包店買麵包，見到有個大概4-5歲嘅小朋友打開咗個櫃，用手指沾麵包上嘅糖霜，之後放入口，重複咗幾次同掂咗幾個麵包

而小朋友媽媽一直喺隔離望住，我都好肯定佢係見到自己個仔咁做。然而，佢最後係想拖個小朋友離開間麵包舖

我見到佢想走，忍唔住（語氣平靜）話：「小姐，你小朋友掂過晒嘅麵包，其實你應該要買㗎，或者同店員講啦」

唔知個太太係落唔到台定點啦，好大力推個仔落地，再指住佢好高音好大聲咁狂鬧：「你個仆街仔，嘥錢，搞到人哋出聲話你阿媽啦！」
（佢哋望落去唔係窮，媽媽係著名牌）

個太太一邊鬧，一邊係好怨恨咁望住我，同時又鬧到全部人望住佢哋，小朋友亦都開始大聲喊。我同屋企人都好尷尬，好似多事累到小朋友俾人鬧咁

雖然個女人無鬧我，只係鬧自己個仔，但我個心都好唔舒服。我屋企人就覺得佢只係做戲俾人睇，如果當時無人出聲，佢一定會走咗去

如果大家係我，當時你又會點做？或者我應該私底下同店員講就算？

讀者投稿@路人甲