#ParentLicenses1501

話說今日湊完阿女放學，去茶記食晏

當阿叔帶我埋位時，隔離枱已經有個細路咆吼梗，我估佢應該係同BB車入面個小朋友玩梗，但真係好嘈、好大聲

我當時都有望下、睇下佢做咩，事關佢同我女同一間幼稚園，所以都忍唔住去注意

坐低咗之後先發覺好瀨嘢，全程個細路嗰枱不停發出噪音

一枱六個人中間有塊隔板，隔開咗兩批家庭，分別應該係同學加家長，而另外嘅就係細路嘅家姐（小學）、阿媽、BB車入面嘅小朋友

細路嘈完到細路個家姐，係尖叫大嗌嗰隻，而喺BB車入面嗰個就non-stop咁拎住隻叉鑿落隻碟同枱度，鑿到好似人哋裝修咁

最好嘢當然係個老母，佢全程都無出過一句聲去叫佢哋停下或者靜啲，佢哋有佢哋嘈，老母有老母食飯

我同坐對面個食客，周不時都被佢哋嚇親，實在令人要望一望佢哋嗰枱

兩個大嘅咆吼起上嚟，係真係嗌到好似啲重金屬樂隊嗰種嗌法，再加埋個細係咁敲同鑿，真係完全重金屬樂隊育成中咁

我真心諗唔明，一個小學，一個幼稚園都控制唔到，兩個都被你湊到怪獸咁，點解仲要生第三個？

真係人都癲，可能你自己對到麻木咗啫，但可唔可以顧及下其他人感受呢？

圖片來源@爆粗band友
讀者投稿@媽呀🤦‍♀️