我唔係為錢

#ParentLicenses2114

幾個月前,我返兼職嘅地方有同學受傷,事件涉及係兩個差唔多年齡但體形有啲差距嘅十三四歲男仔,因玩耍而導致事情發生

事件所涉及嘅兩名男仔,其中係同學A,佢嚟咗幾個月,比同齡高少少,正常身形,鐘意認叻自以為是;被推跌係同學B,佢嚟咗年幾,正常身高,稍肥,冇乜禮貌,把口唔收。事件中被A推跌嘅B用手撳地,結果B嘅手腕骨裂咗

當時有一個同齡男生及四個成年人在場,有CCTV錄影但有盲點。A即場有同B道歉,以及叫B睇醫生後佢會賠醫藥費

B媽帶咗B去睇跌打同西醫,一星期後向學校投訴A特登推跌及欺凌B。B媽指出佢個仔從來唔講大話,長期受A欺凌好耐,屬故意打及推佢。B媽要求我哋交出A家長嘅聯絡電話,否則報警

於是,老細要我哋睇下同調查下發生咩事

CCTV影到兩人玩玩下離開錄影範圍,之後只錄到重喺鏡頭內嘅人,及A隨後獨自入返鏡頭內。我同同事查多四星期CCTV,同樣冇發現B媽所講嘅情況,反而見到兩個同學成日嘻嘻哈哈打鬧,甚至B會玩到起腳

我哋再問埋幾個每次都在場嘅成年人(包括老細)同嗰個差不多年齡嘅同學,所有人都一致表示,覺得A同B好friend,而且一齊玩得好開心,冇聽過有人話覺得受委屈

我向B媽講返CCTV冇發現,然而B媽只不停要求我哋交出A家長嘅電話,同多次強調唔係為錢。但基於私隱原因,我哋只話代為聯絡及約見面

我聯絡A媽時,A媽話A有時玩得粗魯,但唔會欺凌同學。當佢知道A整傷人後查問過A,的確承認係A唔小心,亦訓示過佢,並願意同B家長見面及賠償 (但常理下應該都唔會有家長承認自己子女欺凌人,所以我哋都係抱持平嘅態度)

當我聯絡B媽時,B媽要求A賠$2,000,話B受傷情況會影響學習,隻手重生癬(利申:B本身手係有濕疹同癬,非受傷而出現,但受傷有冇加劇就唔知)。我向B查詢當時情況同點解一直冇講,B就支支吾吾(從來未見過佢講嘢咁猶豫),而且聽到阿媽喺電話旁講有引導性嘅說話,例如「你講佢點打你推你」「你話你唔鐘意」。最後我傳達咗A家長嘅說話,B媽話要同B溫習,遲啲再講就收咗線

兩三日後我同事聯絡B媽想確定會面日子同時間,B媽話要先睇CCTV。幾日後佢睇CCTV及影咗我地CCTV位置,然後話要睇埋另一部(我哋重有部做樣的CCTV,但壞咗好多年且老細懶整)。同事話嗰部已壞好耐了,連線都冇駁

B媽過兩日send message嚟,指控A家長:「A家長唔敢見面談判,所以要求賠$10,000,如果肯談判就$5,000,否則報警」

B媽又再強調唔係為錢

我覆佢:「當日電話中已話A家長好願意同你見面同賠償,只要你確定日子時間」

B媽:「點解你哋CCTV冇咗一段?你哋為咗掩飾cut走咗?我問過我老公,佢話你哋好有問題,我老公建議我報警呀!」(呢段文字佢係錄音)

我完全不明所以???

我:「我哋冇cut過條CCTV片,的確有盲點,係影唔到,如果你哋prefer報警處理,我哋亦唔阻止」

B媽:「我做呢啲CCTV公司,我好識呢啲嘢,我睇得出你哋有cut過條片。對方家長再唔出嚟,我就報警!」

我好想問佢係理解唔到,定左耳入右耳出?人哋咪話OK見面,係你唔肯confirm日期時間而已。但出糧嘅我冷靜地終於同佢約咗見面時間,通知埋A家長

點知!DKLM佢兩日後再打嚟直接搵老細,話點解A家長唔肯見面?

乜料呀?老細小到我上天花板話我點做嘢,我話約晒㗎喎,老細話佢話對方唔肯見喎,又嗌報警。佢既然咁想報警︿不如叫佢報警算啦

最後老細打俾佢問佢報警定點時,又約另一個時間(屌,講講下原來原本約個時間佢突然唔得,自己講完又想改)。又要再通知A家長,A媽好爽快答應咗新時間

到見面日,A同阿媽嚟,B同父母加個男親屬。一開波,A媽就係捉住個仔一齊道歉,B仍然堅持A係特登,但今次語氣比電話嗰次就講得咬定好多

其後,B媽就咄咄逼人,不停話我哋cut咗CCTV條片,於是又開多次全部人一齊睇住條片,當中時間係正常流動。B媽仍然堅持佢做呢行,好識呢啲嘢,話老細咁樣佢可以報警

老細話:「冇問題,你叫警察CCTV拎返去查」

B媽就話:「你哋CCTV唔應該有盲點,我做呢行我好熟」

老細答佢:「你有建議可以之後俾啲意見我哋,或者留個卡片我哋遲啲搵你搞個CCTV」

最後B媽發洩完,A再道歉,誠意一般,做下樣嗰啲態度,相反A媽就好真誠話非常抱歉

老細問B:「接受嗎?」

B話:「接受,我都相信A冇心嘅,我想A明白自己失控可以搞到幾嚴重,我唔係為錢」

哥哥仔,你一直好堅持人哋係特登先搞到咁大壇喎,而家你又突然間相信對方冇心?我真係get唔到

B媽重要搭句佢個仔好善良又怕事(阿媽可能唔知佢不在場時,阿仔對我哋啲職員幾冇禮貌),然後A媽賠咗唔記得$5,000定$8,000,老細再送多$2,000慰問金

A走後我同同事私下問B:「覺得A欺凌,點解咁多大人在場一直唔出聲?」

B話:「覺得係故意,但唔想A有麻煩所以啞忍」

心諗你識人幾個月每星期見得一次就咁為人著想,就連阿媽都唔講,任人恰你?

但我哋都未再講到其他,B媽就衝埋嚟問有咩要問佢個仔,又話我哋識佢個仔咁耐都知佢好怕事好細膽(Sorry,係完全相反),於是我哋循例叫佢以後保護自己要出聲

B媽亦冇留低佢嘅CCTV公司卡片,壞咗嗰部CCTV仍然冇整

我唔知邊個啱邊個錯,我明B媽想保護個仔,但佢嘅行為真係令人好反感。B本身係受害者,個個都覺得佢好陰功,但俾佢阿媽咁搞法,而家大家暗地都有感係佢自己玩到整親,然後阿媽教佢講嘢搞大件事想攞多啲賠償

而且唔知係咪覺得啲學校怕報警,就成日將「報警」掛口邊,又老屈我哋剪過CCTV。大佬我哋小職員識睇playback咋,點識剪接呀?

小朋友之間有咩爭執誤會,家長嘅處理方式真係好重要。經過B媽大吵大鬧,分分鐘搞到以後冇人敢同B玩,而且會令人覺得B係迎合阿媽要求而講大話;相反,A就算本身有嫌疑,但佢阿媽冷靜積極處理同會面時個真誠態度,反而令人覺得A唔似會欺凌

圖片來源@功夫
讀者投稿@小職員

error: