要睇動物就去動物園

#ParentLicenses1931

每逢暑假都會出現一啲不負責任嘅家長亂放仔女嘅現象

本人有養狗,一如既往都同其他放狗人士喺某個空地放狗,而最近每日都會出現唔同小朋友走嚟睇狗仔嘅情況發生,小至3, 4歲,大至十幾歲都有,佢哋嘅家長通常企喺老遠玩電話

有次有個細路衝過嚟扮狗吠,然後問:「佢咬唔咬人?想摸下!」

當然,小朋友嘅「摸」就係一嘢拍落狗仔頭上,就算教咗佢哋幾次正確做法都唔掂,我唯有保護狗仔帶走佢;同時都知道如果我隻狗忍唔住咬到佢,責任就變相喺我度,我都肯肯定大部分人會指責隻狗多過個細路

之後個細路見我唔同佢玩,佢就拎咗人哋個主人條狗帶,但狗仔唔肯行,佢拖行狗仔磨地咁瘋狂跑,轉頭個細路又拎咗第二個隻狗衝入狗群,然而人哋個老豆都依然坐喺一邊玩電話

又曾試過有家長帶小朋友入狗公園當睇動物園,有隻狗明明無掂到佢個仔,個小朋友都話俾狗咬;亦有試過有個小朋友突然抱起隻狗然後扔落地下,佢嘅老豆竟然唔好意思都無句,零反應翹埋雙手企喺度

我想講好多人當寵物都係自己嘅寶貝仔女,如果你仔女俾人拍個頭、扔落地,又或者俾人拖行磨地係咪無問題先?狗公園同人哋嘅狗仔都唔係你哋嘅樂園同玩物,要帶佢哋去玩就去遊樂場,要睇動物就去動物園

作為家長好多基本嘢係要自己教,但唔識教嘅就唔好生。假設有小朋友俾狗仔咬,希望大家第一反應唔好賴隻狗仔先,家長都係責無旁貸

圖片來源@西遊記大結局之仙履奇緣
讀者投稿@西灣河

error: