#ParentLicenses2457

女兒今年四歲，性格一向比較內斂慢熱，係典型嘅觀察型寶寶

今年難得疫情完結，我幫佢搞咗個生日會。除咗希望大家可以同佢慶祝生日外，我更想從中鼓勵佢以主人家身份，大膽啲去招呼賓客，學習社交之道。可惜生日會上發生咗一連串嘅事，令我呢個做阿媽嘅非常耿耿於懷

當日我邀請咗一眾親友以及女兒幼稚園嘅同學出席，其中有一位女同學性格就比較活潑好動，佢同佢媽媽當日喺生日會開始後一小時有多先嚟到，而佢哋一登場就令到原本好地地嘅生日會，氣場360度大轉變

首先，嗰位媽媽一嚟到就不斷喺會場自拍同呼喚我哋嘅攝影師哥哥幫佢兩母女影相，講緊齋係喺我幫我個女設計嗰塊backdrop前面，佢兩母女就霸咗起碼半粒鐘

都不特止，佢嚟之前已不斷喺媽媽群組度叫人等埋佢哋先好切生日蛋糕。咁佢都開口叫到，又冇理由唔等咁絕情嘅，雖然我個場只有book咗2.5小時

一小時有多後，終於等到佢哋大駕光臨，切得蛋糕喇。諗住我哋一家三口同個蛋糕留個倩影先啦，點知嗰位女同學突然亂入，喺咁擺「舖屎」賴死唔走。最後一家三口變四口、五口，影咗成輯佢兩母女嘅沙龍咁滯先肯彈開，連爺爺嫲嫲都攝唔到個影相位，差啲以為佢兩母女先至係主角囉

輪到吹蠟燭嗰刻，女同學一早攝咗入C位等吹就梗㗎啦。Okay，唔緊要，她只是個小孩。當日我訂嘅係一個特大扑扑蛋糕，我一早已同女兒溝通，話佢知要同其他小朋友一齊扑至開心。但你又點會諗到喺壽星女拎起個捶仔好斯文咁扑咗兩吓都冇時，突然有把高八度嘅女聲發出指令：「Next！到第二個！」

然後嗰位女高音嘅女兒，即係遲到咗粒幾鐘好活潑嘅女同學，佢二話不說，一手搶咗個捶仔大力一扑（由於佢本身都比較大隻），個蛋糕就咁當場俾佢一嘢粉碎

我嗰吓真係屌咗出聲，二千幾蚊嘅心血，一秒俾你個路人甲打散晒，重要當自己係主角狂擺post影相

至於嗰日我安排嘅扭波波同埋face painting環節，唔使問都估到，條隊超過八成時間都俾呢兩母女無限輪插啦

而令我覺得最嘔血嘅係，其他媽媽之後send返嗰位媽媽嘅ig story截圖俾我，見到佢竟然無恥到將佢女個名大大隻字咁打出嚟，遮住backdrop上原本係我個女嘅名，完美做到鵲巢鳩佔嘅效果

事後我都有問返女兒嗰日生日會佢開唔開心，佢話開心，因為第一次見到好多親友同佢慶祝。佢重問返我轉頭：「點解自己明明好開心，但又好似想喊咁？」我諗佢應該係覺得感動。聽到咁，我頓時覺得之前辛苦籌備一個生日會俾佢係好值得

然後我問返佢有冇因為被嗰位女同學搶風頭而唔開心，佢就話冇。佢重話嗰位女同學都係同一個月生日，所以佢唔介意同佢一齊吹蠟燭，之前喺學校都係咁

一方面我好感恩女兒嘅善良，另一方面我又好擔心佢嘅善良會俾其他同學踐踏而受到傷害

其實幫小朋友搞一個生日會，真係要用好多心機、時間、愛同金錢，但嗰位媽媽二話不說，攞住份用反斗城花紙包住嘅淘寶禮物，騎劫咗人哋成個生日會，我真係好嬲，同埋都係好嬲！

我知我咁諗可能係好小家，唔知呢度各位考咗牌嘅家長又點諗呢？請多多指教

相片來源@勇者王
讀者投稿@媽媽好小器