識唔識將心比己?

#ParentLicenses1900

以下為真人真事親身經驗
.
某一個星期日大概晏晝3點幾4點,我去咗旺角火車站Moko商場,遇上BB扭計,就去咗5樓育嬰室
.
入咗去育嬰室5分鐘都無,外面已經有人好大力咁推門

我即刻應咗:「有人」
.
當時我只係剛剛替BB換好條片,不過見有人等,自己都拿拿臨餵奶,快手俾下個
.
點知,都係幾分鐘內嘅事,外面又好大力嘗試開門,都斷斷續續有4, 5次,搞到BB飲緊奶都嚇親,整個用房過程好肯定都係10至15分鐘內。到最後,我連BB都未掃好風就趕住走,唔想再俾外面嘅人大力開門催同嚇親BB
.
好想同呢對極品父母講,你BB有需要就即時要有房用?如果當刻你咁急點解唔落去3樓另一個育嬰房?咁有心機外面推門催人?其實你出得街就預咗要同人share、要排隊。我相信個個都係有需要先用育嬰室,當我自己BB爆喊,都係要排隊等育嬰室,等幾耐都係氹住BB咁等,因為知入面都係有需要嘅人用緊
.
點解你哋兩個為人父母都可以咁無禮貌,唔識將心比己?係咪你哋都係咁教小朋友㗎?
.
圖片來源:WhatsCap
文章來源:讀者投稿@Babymoko

error: