#ParentLicenses2435

阿爸過咗身幾年，得返阿媽孤零零，我哋做女嘅每星期同佢飲一次茶

近年有得去旅行，阿媽諗住計劃同班麻雀友四圍去，不過上年阿妹生咗個仔，本來係開心事，自從陪月走咗後，阿妹認為老人家湊孫好過工人湊，就決定要阿媽幫手湊。結果阿媽冇得去旅行之餘，重要搞到佢一頭煙

喺陪月臨走前，阿妹未放完產假，佢就whatsapp問阿媽可唔可以幫手一星期湊一日

我：「你唔好應承佢啦，佢兩個成年人啦，俾佢哋自己搞掂。你都老啦，不如享受下人生同朋友去旅行好過」

媽：「一星期一日啫，應該搞得掂」

都未夠一個月，由一星期湊一日變咗一星期湊三日，放完產假甚至變咗湊一至五。我妹放星期六日，小朋友半歲後變咗住埋婆婆屋企??‍♀️

然而，重點係我妹由頭到尾都冇俾過家用

我而家逢星期日要帶埋我對仔女上阿媽屋企協助，終於有日我媽病咗，令我又要湊人哋個仔，又要湊我對仔女，又要照顧阿媽。我隨即打電話叫阿妹快啲接走個仔，佢竟然話同老公睇緊戲唔得閒過嚟

睇住我妹ig，絕大部分都係同佢老公二人世界，唔係自助餐就係shopping 嘅合照。我忍唔住留言鬧爆佢，結果佢班朋友就走嚟鬧我

「好多人都係咁樣俾老人家湊㗎啦」
「俾啲媽媽抖下啦，媽媽都要二人世界」
「你做人家姐咁狠毒，唔俾個妹休息下」

我心入面有兩個疑問：第一，阿妹你究竟識咗啲咩人？第二，我同阿妹相差七年，係咪而家啲人都鐘意扔個細路俾四大長老湊，然後拍拍囉友走人？

重有一壇係BLW。阿妹個仔要加固想行BLW，佢寫低張紙俾我媽叫佢跟住做。但你哋都知老人家根本唔知咩係BLW，亦會驚哽死BB。最後我媽整糊仔同菜蓉餵算，結果被我妹鬧死，我媽係咁道歉

我：「咁叻你搞囉，咩都隊俾人哋搞掂，自己咩都唔理，你點做人阿媽？」

我應該點勸我媽好？

讀者投稿@湊孫深似海？