#ParentLicenses1833

回應 #ParentLicenses1831，延伸閱讀：https://parentlicenses.hk/?p=2595

如果見呢個媽媽入咗其他（媽媽）群組，祝大家好運??其他事蹟如下：

1. 葉酸

有次呢位媽媽喺媽媽群組問：「懷孕初期食咩supplement？」

大家都好好咁回覆佢：「頭三個月可以食葉酸，幫助BB發展」

解答完，佢就同大家講食葉酸會嘔，中醫都叫佢唔好食葉酸，然後佢再話俾大家知佢每日食一斤菜，冇問題嘅

咁，你又問？

2. 搬屋

呢位媽媽本身住喺奶奶屋企附近，預咗奶奶會湊，但冇啦啦話為咗自己返工再方便啲，再搬離咗奶奶屋企，佢就同大家講每日都會來回接送BB

大家當時都同佢講：「諗清楚呀，其實都會好辛苦㗎！」

OK，出於係佢個人選擇，佢選擇照搬，後來得知佢係大屋搬細屋

大屋搬細屋又係咩玩法？其實用少少腦袋都知，BB出世後真係有好多嘢

3. 長老湊

BB出咗世之後，呢位媽媽經常都話老爺奶奶唔肯落去佢哋屋企幫佢湊BB，又嫌奶奶湊BB呢樣嗰樣

媽媽群組嘅媽媽一早同咗佢講俾奶奶湊點都會有相處上嘅問題，然而佢真係日呻夜呻，呻到大家都開始懷疑奶奶唔係佢所講咁差

同埋，老人家肯幫你湊，你仲想點？唔係俾家用佢哋就大晒㗎！到咗呢個年紀，湊大你老公，而家仲要幫你湊孫，仲唔識得感恩？！老人家湊孫，係愛你哋，想你哋安心出去做嘢呀！

4. 貪婪

成日都喺度排free嘢，跟住俾佢排到又唔想拎，要人係咁提佢拎。最可笑係自己冇私家車，但又排埋car seat

BB未夠1歲就排K班校服，請問你要擺幾多年？重要係女仔校服

5. 生病

BB發高燒，佢幫BB塞肛塞到低溫，又話自己偏保守，BB瞓覺緊要啲

係，普通發下燒，都會鼓勵大家俾BB瞓多啲，但而家出現低溫呀，大佬！

當大家問佢點樣同BB探熱，佢就話探熱輕手啲，驚整醒BB

咁即係個體溫冇準確量度過？咁你又同BB塞肛？

低溫後，佢話BB可能肚餓，要煮啲米水俾佢飲先，竟之後一星期都飲米水，仲話BB啲便便好稀

咁奶呢？BB唔洗食奶？一個星期飲米水，大人啲便便都稀啦，做咩你自己唔試下呀？

6. 常識

佢喺退出群組前係咁話人哋鞭佢屍，呢個媽媽日日求關注，如果唔係大家點會知你唔換屎片、發燒俾錯、探熱輕力到探唔準呢？大家唔係處於道德高地，而係常識啊！係常識啊！係常識啊！

常識真係好重要㗎！

7. 專制

講歪理都要人讚賞，人俾意見就係指責，講得多少少就發脾氣話人鞭屍，唔通大家喺WhatsApp群組同你講嘢都要每句計住講到第n句就停？係咪咁反智？

最後，個個都曾經係新手媽媽，唔好生仔生埋個腦出嚟，常識真係好緊要，唔好棄掉

圖片來源@回魂夜
讀者投稿@癲媽