#ParentLicenses1789

其實有冇人明白我呢啲冇仔生嘅人嘅感受？

由細到大，我都係一個好有計劃嘅人，由讀書選科、到出嚟做嘢、進修升職、理財置業、成家立室，我覺得只要好好計劃，天道酬勤，好多嘢都可以運籌帷幄

但就唯獨是生仔，永遠都係out of 我roadmap之外

我同先生由26歲開始計劃生育，一直有維持健康生活習慣 ，body check過兩公婆身體狀況良好，亦適合生育

多年來我堅持養生、做運動、戒凍飲、戒魚生；婚後我買親嘅都係鬆身衫，食嘅、用嘅都係有機產品；買屋買三房，仲一早裝修靚間BB房同工人房；為咗做一個生仔有考牌嘅媽媽，我又讀埋幼兒護理同兒童心理學嘅course

十年咁就過去，最後乜都用唔著

期間，我哋試過朝早6點去排神醫，食中藥調理，又試過打排卵針，人工受孕，甚至絕望到重金禮聘搵風水大師擺旺丁陣……

無數次嘅期望，然後又無數次失望

眼見身邊嘅朋友，甚至表弟、表妹、下屬、後輩……一個一個紛紛遲來先上岸，結婚生仔，生第二個，甚至第三個，而自己卻慢慢步入高齡，仍然係沒結果、沒結果、沒結果……

記得頭嗰幾年，每次舊同學聚會，佢哋見我著鬆身衫，總係好期待咁問我：「係咪要報喜？」

後來佢哋問得多，怕我尷尬，開始盡量避開生仔嘅話題；直到有一期，當大部分人都已為人父母，最後話題都係忍唔住返返去湊仔度

我冇怪佢哋，反而係我自己唔想佢哋難得出嚟傾偈都要就住我感受，所以慢慢少咗出席佢哋嘅聚會

中同當中，我同其中一個單身嘅女仔開始愈來愈friend，可能大家嘅生活模式比較相似，想去邊度食好嘢，邊度旅行，邊度shopping，諗起就去，唔似約其他同學咁，又要顧慮小朋友嘅時間表，又要計過度過唔想太貴

後來，我呢位中同識咗男朋友，兩個月後意外懷孕。佢話覺得自己未ready，於是問我意見，究竟應該落咗去定同男友閃婚好

坦白講，我聽到呢個消息後真係晴天霹靂

呀姐，生命嚟㗎，你屋企啲手袋咩，話放就放！？話落就落！？

我兩公婆呢十年嚟千辛萬苦，扭盡六壬，但就卵都冇隻；你家吓一句意外，無心插柳，中咗我哋朝思暮想嘅六合彩，但竟然同我講話「唔想要」，你有冇諗過我感受？公平咩？！

最後佢都決定結婚，生個BB出嚟。我雖然真心戥佢高興，但見住佢個肚愈來愈大，唔知點解，我有種唔想面對佢嘅怪感覺

漸漸我以疫情為由，慢慢疏遠呢位朋友

呢兩年嚟，佢都有不斷嘗試約我，又成日借啲意send BB相嚟，問我願唔願意做佢個女嘅契媽

唔知點解個個生完後都要夾硬同我上契，知唔知我有幾無奈

我每次都要諗唔同嘅藉口婉拒佢，我以為佢get到會罷休，點知隔多一排又捲土重來，大耳窿追數咁，救命！

前排佢仲send咗千字文嚟，大概話覺得好傷心，好似因為自己選擇咗生個女出嚟，代價係失去我呢個朋友

唉，我冇責任影響你生育嘅決定，唔好講到好似係我迫你揀，「嚴重似情侶講分手」咁，得唔得啫？

其實有時「一直躲避的藉口」，真係「非什麼大仇」

我都只係唔想對住你同BB強顏歡笑背人愁啫。係咪我連對自己嘅感受誠實一點，善待吓自己嘅空間都唔可以有？

明白好多父母都好想分享自己生BB嘅喜悅，冇錯，你哋絕對有呢個自由

但有冇諗過，喺一個插緊喉，吊緊鹽水嘅病人面前，仲要強迫佢睇住你瘋狂煎香塊A5和牛嚟食，佢會有咩感受？

放過我啦！

讀者投稿@一個考完牌都冇仔生的人