#ParentLicenses1478

好快就踏入3字頭嘅我終於有勇氣分享我嘅故事

細細個父母感情已經唔好，當年老豆出軌同我媽提出離婚，之後唔知點解又冇分開到

嗰段時間簡直係我人生嘅地獄

當時我6至8歲，嗰兩年每日放學返到屋企就處於極度恐懼嘅狀態，因為基本上，老豆收工一定會返嚟搵我同阿哥出氣

老豆喺我心目中永遠都係一個發脾氣、情緒化嘅人，甚至我一度懷疑佢有燥鬱症——佢打爛過屋企好多嘢，對我哥動過好多粗，鄰居都聽到日嘈夜嘈，仲差啲報警，令我印象最深刻嘅係佢拎刀入房自殘

後來冇離婚之後，佢情緒有少少改善，但都仲會發癲，例如電話費用多咗，佢會打上去電話台個接線生，逼佢waive fee；去大家樂食飯時，以為自己真係去高檔餐廳，啲嘢食唔滿意就小爆個經理；撘飛機delay，就會小啲服務人員等等

我開始減少同老豆接觸係去外國大學讀書時

我仲記得，我拎到外國大學offer，同佢同媽三個喺餐廳食飯，佢好大聲講：「你唔使旨意掂我啲退休金」

側邊其他人都投來詫異嘅目光，但事實係，我升學嘅費用係由另一個親人負責

由嗰刻開始，我萌起要移民，唔想再返香港嘅諗法，而我最後真係成功咗

我老豆開始周圍吹噓我嘅成就，但唔好意思，喺我記憶入面所謂嘅父親，佢只係一個冇諗清楚就結婚生仔嘅粉皮

可能有人會話：佢養到我咁大，冇功都有勞

Sorry but not sorry，生咗小朋友，養育佢成人係責任，小朋友冇選擇過出生，更何況佢從來冇教過任何嘢。佢最鐘意掛喺嘴邊嘅係「積穀防饑，養兒防老」哩八字真言

我由細到大都有抑鬱症，近兩年開始發作，治療咗好耐，幸好又有伴侶支持，終於都冇再嘗試自殺，亦可以正常積極生活

歸根究底，我知道，其實係因為我童年嘅創傷太大

哩大半年，我冇同老豆聯絡，心情好咗好多，我訂左婚，買咗屋準備結婚。我有透過媽向佢傳達哩啲好消息，當然佢冇任何反應，一句恭喜都冇，我諗佢只有一個諗法：好彩我一蚊都冇問佢攞過

無錯，我好自豪唔需要靠你，我已經唔再係當年無助嘅小女孩

多謝我老豆嘅反面教材，將來當我有小朋友，我一定一定會非常愛佢哋，俾最大嘅幸福哋

多謝大家睇晒?

圖片來源@Jer 柳應廷 – 砂之器
讀者投稿@b