#ParentLicenses1784

我係一個教音樂嘅老師，近乎唔同嘅音樂科目我都會教，包括唔同嘅樂器教授、中西樂理、考試伴奏等等，全部都係我涉獵到嘅範圍。同時亦都係因為咁樣，所以我接觸到好多好多唔同種類嘅家長

呢個時代係咪因為而家嘅家長本身都有一定嘅知識，佢哋總會好鍾意用佢哋嗰少少嘅知識用嚟挑戰老師嘅判斷。簡言之——識少少，扮代表，知道真相咪盞俾人笑

例如我教緊西樂樂理，同學概念錯曬，跟住就話我知：「中樂唔係咁教㗎啵」

我就會回敬一句：「其實中樂樂理我都有教喎，使唔使我跟埋你嘅中樂部分，等你概念清晰啲呀😒😒😒」

又例如家下皇家考試改咗用四首考試歌，家長們會走嚟挑戰、怪責，以及質問我：「點解要教多一首？你係唔係唔識教？」

我🙄🙄🙄，再補上一個官方回應：「其實已經改咗近兩年㗎啦，想知道更多詳情，可以上皇家音樂學院官方網站了解一下。如果再有乜嘢唔清晰，可以再返嚟問我」

另外，多得有WhatsApp呢個通訊系統，所有嘢都變得有black and white紀錄

某家長忘記咗自己要求更改嘅新上堂時間，跟住走落琴行對住老細發癲，就話老師「成日忘記」同「搞錯時間」

其實上咗一個月都冇，何來嘅「成日」呢，而且重點係我根本冇改過佢時間，一次都冇！

「精明」嘅老細亦都會馬上體貼地為家長質問老師，當然聰明嘅我會馬上將同家長嘅對話即時截圖俾老細睇

時間係按家長要求調的，日子亦都係家長要求改的，家長亦都親口答「可以」「ok」「冇問題」，咁請問我何錯之有？

亦都最憎人講價：「阿邊個邊個教幾級都係幾錢咋喎，點解你貴咁多嘅？」

大佬呀，問呢個問題之前，你做下功課先啦。阿邊個邊個教咗幾多年，我又教咗幾多年，你知唔知？阿邊個邊個嘅資歷係點樣，我嘅資歷係點樣，你又知唔知？

你要個教咗廿年嘅老師同一個教咗兩年嘅老師收費一樣？你會唔會諗多咗？如果真係要貪平嘅，就唔該直接就搵阿邊個邊個教，唔好嚟煩我🙄🙄

圖片來源@賭俠
讀者投稿@自己都唔識保護自己，邊個嚟保護我哋呢班freelance嘅老師