佢兩歲咋,我控制唔到佢

#ParentLicenses1643

某日平日嘅下午,我同一個朋友求其行入一間價錢親民嘅日式餐廳食個下午茶

正因為平日下午,基本上都係冇咩人。餐廳唔算大,由餐廳行入去,埋牆有一排木櫈(大概6組座位) ,即係裝修時fix咗喺牆身嘅嗰啲木櫈,可以揭起個蓋,櫈下面可以儲物嗰類seating area

店內計埋我哋都係得三枱客,當中坐餐廳最盡頭係一對母子,最近門口係一位叔叔,我同個朋友就坐喺第4枱,而我哋二人都坐埋靠牆一邊,同母子之間都隔離咗一組位置

其實一入去,已經聽到小朋友尖叫,喺張木櫈上又跳又踢,唔肯食嘢,加上呀媽鬧仔嘅聲音,完全覆蓋咗我同朋友傾計嘅聲線。我覺得算喇,都入到嚟,都係公眾場所,我無權控制人哋教仔嘅聲線,是但食完快啲走

隔咗陣,呀媽停止咗鬧個仔,自己顧自己食嘢,然而個仔並無因為咁而停止佢嘅行動,仲繼而變本加厲,又跳又踢得好起勁,持續地發出踢櫈嘅噪音

我終於忍住同佢媽講:「唔好意思呀,可唔可以叫你小朋友唔好再踢張木櫈?咁樣會影響到坐喺呢邊嘅人」

我自問都好客氣

點知佢呀媽話:「唔係我踢喎!唔關我事喎,佢兩歲咋,我控制唔到佢,同佢講咗架喇,你過嚟同佢講囉!」

我反咗佢一下白眼,都廢事駁佢

我心諗:頂!我夠知唔係你喇!你「唔好意思」都唔識講句,仲要俾說話我聽,仔係你生,講到事不關己咁

之後再聽到佢對住個仔補多句:「唔好踢喇,人哋唔鐘意㗎,食嘢喇!」

利申:我雖然無細路,亦都好唔鍾意細路,但我覺得作為父母應要有個盡量唔帶俾人麻煩嘅心態,同埋應要以身作則;相對地,對方都會對你個細路仔嘅行為寬容啲,但同時都要明白容忍有限度,唔係每一個人都會覺得你個細路好得意或者有耐性

讀者投稿@兩歲

error: