#ParentLicenses1642

話說星期六我同媽媽去屯門DONKI買嘢，行到只係三分之一路程就見到排隊俾錢條隊尾，由於我哋仲要揀嘢，所以就無去跟隊尾行

我哋繼續睇其他貨架，行到有一條路嘅兩邊係凍櫃同貨架，路嘅闊度係足以兩架手推車同時通過嘅

當時排隊等俾錢啲人就貼住凍櫃一行排，隔離貨架嗰邊就俾其他人行同睇貨品，各有秩序

排隊隊列其中有兩父子，老豆行前，仔跟後，一人一架手推車。佢哋唔係買得多嘢，基本上一架車兩個籃裝得晒都有突

小朋友成8-10歲，一路排隊，一路將架車扭左扭右，不斷阻住埋貨架嗰邊啲人客通過，然而個老豆都無理過、無望過

小朋友持續成分鐘都係咁，我怕咗佢，我就停低唔行住，然後我就解釋俾我媽知點解停低

同時，個老豆就喺我講緊嘅時候，就叫個仔排住先，隨即企喺貨架嗰邊扮睇嘢，再望咗我兩眼，咁我無理佢，之後個老豆埋返條隊

我再經過佢嘅時候，佢就喺我耳邊好大聲呼喝，程度足以令到我耳鳴vv聲

男（老豆）：「要人讓你過就出聲啦，啞㗎你」

我即刻話返佢：「你痴線㗎！無啦啦喺人耳邊大叫」

佢仲要話返我痴線，我就開始同佢罵戰

男（老豆）：「你先痴線丫，撞到我個仔幾次我都無話你」

我：「我無撞到過你個仔，係你個仔推住架車扭嚟扭去阻住人行，我已經無話佢，你仲話我？你無家教！」

男 （老豆）：「邊個無家教丫？你好有家教丫？撞到人丫你！」

我：「我無撞到佢，你講大話講到咁，唔知醜！係你仔扭嚟扭去阻住晒，仲惡人先告狀，人人都係一個跟一個，係佢一個突出嚟」

男（老豆）：「我個仔不嬲都跟住，邊有突出去？係你撞佢！」

我：「咁睇CCTV丫！！呢度有大把！報警丫！睇下你個仔有無突出去，睇下我有無撞到佢」

個老豆疑似自知理虧就開始轉移話題

男（老豆）：「你大聲就得㗎喇？你大聲你惡就係啱丫？」

我：「係丫！你唔係都係縱惡行兇咩！諗住大聲惡我就怕你！我唔驚丫！個個排隊都係一個跟一個，讀幼稚園開始都有教『唔好突出嚟阻住人』，你個仔讀咩學校㗎？邊間學校教啲學生當呢度係賽車場？！」

如是者，佢開始重覆講咩「你惡囉」「係囉」「你啱晒啦」「你叻晒啦」「做律師啦」

當然我唔會讓步，我就喝佢：「你講丫，你再講丫！你講一句我就鬧你十句！你要惡丫嘛！繼續丫！」

罵戰尾段，佢等我行過咗兩個貨架後又細細講：「啲人真係惡就得㗎啦！」

我就一嘢喝過去：「你再講丫！你再唔收聲丫！」

最後佢即刻收皮！

我知實有好多人問：點解唔可以一開始就叫個小朋友排返好，或者講唔該借借，要咁樣嘈？

一、唔應該要人哋開聲，由細到大都有教嘅嘢，自己應該要做到。唔係3, 4歲，呢啲基本禮貌小學生已經好清楚

二、家長放任個小朋友自己推住架車喺佢後面行，理都唔理下，毫無管教照顧嘅意識

三、家長當正自己個仔係完美，唔鐘意自己個仔俾人話。我同我媽講個小朋友扭左扭右，直至個老豆望我哋之後撩交嘈就可知

四、家長為咗合理化自己鬧人，就亂講大話，指責我撞到佢個仔，其實我根本掂都掂唔到

我知實又會有啲人話：你咁嘈法都唔見得有家教

我一向唔認同要心平氣和同呢種人溝通，家教係留返嚟對住有家教嘅人。個家長要選擇侮辱人，縱惡行兇嘅方式去欺凌他人，我就會用同樣嘅方法雙倍對佢

有啲人就應以好似老一輩嘅講法：「出爐鐵，唔打唔得」「唔見棺材唔流眼淚」，唔係你好言相勸就會有好結果，呢個家長就係其中一個

我停低嗰陣同我媽講都只不過係話：「唉，個小朋友推住架車扭左扭右，我等佢過晒先喇」

當中無任何辱罵字句，我亦無話過佢小朋友，只不過係我母女之間嘅對話。呢個家長都癲成咁，所以佢抵俾我大庭廣眾用吆喝嘅方式對待佢

希望家長們以此為鑑！無人應份要遷就你嘅小朋友，亦無人應份要有禮貌去對待你哋嘅無禮！如果心痛自己小朋友俾人話，就做好自己管教嘅責任，而唔係要全世界去遷就你嘅小朋友

圖片來源@打鐵戰士
讀者投稿@打鐵戰士