唔係話你有問題呀!係話我哋呀!

#ParentLicenses1496

咁啱今日放假,就同屋企人帶三個小朋友去公眾遊戲室玩,最細嗰個女係兩歲半

我一入到去就見到有個媽咪好似幫個仔影硬照咁,係咁叫個仔擺pose俾佢影

再過一陣,見到有個爹地係咁將啲軟積木搬去同一個地方砌返幅圖,原來又係為咗同個仔影相

遊戲室內有個長方形嘅軟滑梯,當時只有我三個小朋友玩緊,同時我細女想喺斜面嗰邊爬上去

突然間,影相嗰個小朋友跑過嚟,跳咗上我細女上面,狀態係好似騎住咁,但未掂到我個女嘅

我諗住佢咁大個(應該有6, 7歲),應該會爬得返上去,而且唔會照瀡落去卦,我亦都有叫聲「小心」

點知……佢竟然真係照瀡落去!!!我即刻去護住個女,大聲話:「你有無搞錯呀?有個小朋友,你照瀡落嚟!」

但佢竟然一句對唔住、乜反應都無,就走咗去繼續玩!嗰下我真係著咗!

我再講:「小朋友,你整到人仲要走咗去!?」

跟住佢全程個屁股都係痴住張櫈嘅父母對眼先至從佢哋部手機離開,抬起頭問:「乜事?」

我:「我個女喺度玩,你個小朋友突然跳上嚟,爬咗喺佢上面,之後仲要壓住我個女!」

佢老豆:「咁你想點?」

我:「佢要道歉!」

佢父母至大叫佢個仔:「你係咪頭先整親人?你過去同人道歉!」

佢個仔繼續玩,佢父母繼續坐喺度,遠距離叫咗幾次,開始火滾:「你同我過嚟!」

小朋友終停低無玩,老豆火滾問:「你頭先係咪整親人呀?頭先發生咩事?」

佢仔:「我無呀!係佢哋搞住我咋!」

我真係聽到眼都突

佢老豆:「而家人哋話係你整親佢呀!咁我嗰刻又無望到實,咁人哋話你整親佢,你就道歉啦!」

佢仔:「無呀!係佢哋搞住我咋!」

佢老母:「咁你係咪唔道歉?得!咁叫警察嚟囉!咁到時真係證明係你整親人,警察就拉你!」

個仔開始喺度喊

佢老豆:「我又無看住你,諗住你搞得掂,諗住你照顧埋細佬,點知你又搞件咁嘅事出嚟!而家叫你道個歉有幾難?你而家咪蝕底囉!人哋媽咪喺隔離睇實,咁如果你堅持話無整親人,咁我哋睇閉路電視!萬一搞咁多嘢之後,真係發現你係整親人嘅,你就知死!咁以後唔好過嚟玩喇!你係咪想我之後全程都要望住你玩?真係帶你嚟玩仲辛苦過我揸車!」

個仔喊到驚動到遊戲室姨姨入嚟問咩事

姨姨一入嚟就走過去攬住個小朋友,問佢:「發生咩事喊?」

但由我講咗件事出嚟

姨姨:「哦!咁整親人就要講對唔住嘅!哩度有啲小朋友細過你嘅,所以要小心啲,唔可以跑㗎!咁去道個歉就無事喇!無事無事!唔好喊!」

最後,個小朋友被逼同我哋道歉

道完歉,佢老豆繼續同個仔講:「你知唔知你咁樣好蝕底?老豆又無全程望住你,而家人哋唔係話你呀!係話我同你媽咪無好好看住你呀!唔係話你有問題呀!係話我哋呀!你知唔知!」

我心諗:我真係話梗你哋㗎!

其實我一向鵪鶉怕事,但如果有人令到我小朋友受傷就幾大都無情講,我都係第一次喺大庭廣眾咁「搞事」

或者有人覺得我對個小朋友太過火,但姑勿論誰是誰非、有意無意,整親人就要講對唔住,乜呢啲唔係基本禮貌嚟㗎咩……?

讀者投稿@無意幫人教仔既媽咪

error: