#ParentLicenses2798

逢星期六朝早去屯門西北游泳池，都見到有個老母帶個目測三歲嘅女去學游水，有個女教練一對一

每一次都聽到個老母好大聲鬧小朋友，鬧到全場都聽到。好多時都係小朋友俾佢捉上水打晒冷震咁鬧，公眾泳池已經停咗暖水，天氣仍然係涼涼地，又凍又驚又喊晒

老母鬧佢分心，話佢做唔到動作，又會拎埋屋企學校啲嘢出嚟鬧，例如做功課做得慢、成日發夢、家姐做到佢做唔到之類。教練就一直等佢鬧完先繼續教，唔出聲亦唔阻止

今日（2/5）個老母直頭換埋泳衣落水，全程關公咁樣怒睥住小朋友，雙手放胸前，跟埋教練同個女一齊喺泳池裏面行。教練指導小朋友做自由式手部動作，佢又出手又出口，每一下都好大力揈小朋友隻手做划水動作，又係不停鬧。教練好無奈咁扶個小朋友繼續游

我唔知個老母對小朋友有幾大期望，係咪已經備戰緊奧運，但佢嘅行為不論對小朋友學習，甚至對其他泳客都係一個好大嘅騷擾。先唔講小朋友會唔會對游水產生恐懼，但絕對唔會係享受

佢嗰邊嘅泳線永遠都最少人，因為所有人都怕咗佢。除咗佢哋同泳會嘅人，大部分人都會遠離佢哋，令到其他泳線好逼

同埋我覺得對教練好唔尊重，既然帶得小朋友去泳會學，上課時就應該放手俾教練處理，家長有咩想再教再加強，可以落堂後繼續喺泳池練習，而唔係直接喺課堂插手，又或者索性自己教啦

讀者投稿@子非魚，安知魚之樂？