#ParentLicenses1482

近期又開始新一輪嘅學位爭奪戰，有人歡喜有人愁，做家長確係唔易。但我想講，其實入到名校都未必一定好，入到band 3又未必一定差

我親戚有兩個仔，相差5年左右

大仔小學階段讀書好叻，年年級頭，而且好有禮貌；到升中嗰時，佢考到其他區嘅band 1名校。家長好開心，但小朋友就每日坐好耐好耐車返學

聞說喺中學呢幾年，小朋友跟唔上進度，讀得唔開心，再加上踏入青春期，個人好反叛，最後變到好無禮貌，甚至同家人經常有衝突

家人好頭痛，亦覺得佢喺香港讀唔到書，早兩年已經送咗小朋友去英國讀書

至於細仔，小學成績就麻麻，曾經因為差1, 2名被學校踢出精英班。細仔面上暗瘡嚴重，個人好易燥，同家人相處好易發脾氣，學校都無乜朋友。家人對佢都無乜期望，升中安排就是但抽獎樓下band 3學校入讀就算

同佢哥哥情況相反，喺中學呢幾年，聞說佢發展得好好，成日攞學術獎，成績級頭，喺學校又識到朋友。雖然踏入青春期，但個人變得好有禮貌，見到人例必打招呼；當見屋企人無櫈坐，一定會讓座；佢又會幫手做家務

有一次，佢考得好，老人家封利是俾佢，最令我驚訝嘅係佢拒絕咗，原因係佢覺得讀好書係自己責任，而且呢啲錢係老人家嘅辛苦錢，唔係佢嘅錢，所以唔可以要。呢一啲說話，竟然出自由一個中二學生口中講出嚟，係令我震驚

兩個小朋友，一個由好轉壞，一個由壞轉好，我覺得惋惜，同時亦覺得欣喜，身為家長嘅我亦有反思，原來入到名校唔係一切，入到band 3亦唔係絕路，希望家長們共勉之
.
讀者投稿@新手媽媽