#ParentLicenses1467

見到有媽媽講孭書包嘅問題，令我都有嘢想講

唔單只係孭書包，其實小朋友出街扭計、扭抱係正常不過嘅事

每次喺街度，周邊啲人見到我唔抱起個小朋友，見到佢喊住唔願意行都唔理，佢哋就一個二個鬧我，甚至有啲仲好似想報警咁款

其實我都係想訓練個小朋友唔好扭計要抱就抱，先至咁硬心腸。當自己個寶貝喊時，你估做阿媽嘅唔心痛咩？但問題係咁抱法抱到幾歲？有腳識得自己周圍走點解要抱呢？

我唔係無俾鞋佢著住行，又唔係叫佢赤腳行石春路，點解要當我虐兒？或者你有無諗過，其實會唔會係個阿媽唔夠力抱、唔方便抱等等嘅原因呢？

當有人見到我小朋友咁細個自己行，然後就話自己個小朋友或者孫到小學都要抱嘅時候，點解你哋唔諗下係邊個搞成咁呢？

人哋教仔時，拜托唔好出聲、唔好多事啦好唔好？關你鬼事咩！？我唔信舊陣時嘅你哋唔係咁對自己啲仔女囉，又或者你唔係俾你阿爸阿媽咁對待囉

錫還錫，教還教，第時見到你啲小朋友或者孫仔孫女大大舊都仲要抱住嗰陣就真係唔知邊個醜啲！

讀者投稿@新手媽