#ParentLicenses1466

我有兩個女分別4歲和6歲，奶奶細妹間村屋兩層高連天台

最近疫情緩和咗好多，所以家人都想多啲聚會，就打算叫埋一大班親戚總共有廿幾人一齊聚會

然而，佢哋表面上會用公筷，但實際上夾夾下都會唔用，諗真都有啲擔心我兩個女，唯有到時可能再諗辦法

年尾老公嘅表妹結婚，多數都會搞婚宴。我都有問奶奶：「如果到時爆到七彩，過百單、幾十單咁，點算？」

點知奶奶嘅反應就係一如以往：「有親戚叫到，一定要全家出席，唔理當日確診數字幾嚴重，冇得推！」

我叔仔第一時間都有鬧爆奶奶，叔仔話佢啲小朋友得兩歲，去到感染病菌又點算？好牙煙呀！

奶奶話：「其他親戚如果第時唔出席你喪禮，咁你又如何？係咪咁唔畀面？係咪咁冇人情味？」

總之奶奶一路鬧爆叔仔唔啱，話佢唔孝順父母，一味數臭

不過我估老公表妹見到時勢色唔對，應該會取消嘅

為求達到目的，奶奶已經向我兩個女埋手，就話：「有咩party、聚會一定要去呀，好多小朋友同你玩，又有玩具，有好多好嘢食」

兩個女被催眠，都同我講話一定要去，如果唔係佢哋會嬲嬲豬、喊喊喊豬。除此之外，奶奶仲會用啲禮物嚟引兩個女同我講㗎喇！

我作為大人去就冇所謂，但係點解兩個女咁細個都要去呢？知唔知咁細個嘅小朋友係未可以打疫苗住？奶奶完全一啲警覺性都冇

老公嘅反應就係話：「到時先算啦，到時就先諗辦法去應付」

不過我見叔仔一出聲都已經被奶奶鬧到趴晒街，都知唔仲可以講啲咩

奶奶仲話叔仔生於呢個家庭就一定要聽父母講 ，唔可以反抗??。仲話佢打靶仔， 父母平時最錫就係叔仔，居然夠膽咁樣同父母講嘢？！

到時如果兩個女真係扭晒計我都唔知點算，始終奶奶一定會使盡辦法叫個女不停嘈

好心奶奶教啲小朋友要有正確衛生常識，唔係一味為面子、為傳統觀念咁樣

我怕我應付唔到奶奶教返兩個女嚟對抗我，自問自己都唔識解決，所以我諗我未完全攞正牌生仔

請問大家有咩高見？

讀者投稿@milk