#ParentLicenses1465

好多家長出街都會俾小朋友睇電話，目的想佢哋安靜啲，但我真心想分享下我見過嘅兩個情況，希望各位家長真係諗清楚，小朋友係咪真係非電子奶咀不可

有一次，我同女女喺茶記食下午茶，留意到一對婆/嫲孫（小朋友大約初小學生嘅年紀）嘅互動

佢哋一坐低，咩都未做，口罩都未除，唔使小朋友要求，位老人家就直接俾部電話小朋友

然後小朋友除咗講食咩之外，全程係同個老人家零交流，只會一直望住個電話食嘢。就算老人家同佢講嘢，佢都係零反應，直到走都無講一句嘢

老人家自言自語，最後見小朋友無反應，佢自己都喺度撳電話，直到走為止

另一次，就喺尋日發生嘅事。我接女女幼稚園放學後一齊去食早餐，到餐廳時，見有另一間幼稚園嘅小朋友同媽媽食嘢，睇年紀至少都應該有K2

小朋友坐低前都會同啲伙計、阿姐打招呼同傾計，點知轉頭坐低，又係唔使小朋友出聲，媽媽自動拎電話出嚟，同上個case唔同嘅係，位媽媽仲set 埋架俾佢睇

呢個年紀嘅小朋友，我相信自己食嘢應該係無問題，帶個圍兜基本上唔會太污糟，但個媽媽就全程餵，同時小朋友對眼就全程睇電話

我有少少懷疑，小朋友究竟知唔知媽媽餵梗佢食咩；佢仲要「哄」到勁埋睇，眼見佢睇到有少少鬥雞

整段時間，小朋友又係同媽媽零交流。就算嘢食嚟到，媽媽問佢食咩，叫佢食嘢，小朋友都係完全無反應，咩都係媽媽隊埋佢個口就食

有人可能覺得我好八、好多事，又特登望人，其實只係我當時坐嘅位係啱啱對正佢哋，就係無嘢做、唔食嘢，抬起頭就係對住佢哋個種

當時我同女女食嘢，我食完，仲等梗個女食，坐喺度又無野做，所以先會留意到身邊嘅情況

其實小朋友呢個年紀係最多嘢講、最多嘢會想同大人分享，亦係最痴你嘅年紀，但係就偏偏出現咗十幾歲就對住個電話，即使同你同枱食飯都好，只會各自修行，我覺得有少少婉惜

當小朋友食飯習慣性睇住電話，無論對佢學習待人嘅態度、眼晴健康，都真係無咩好處

可能你會話「唔俾一陣又俾人話嘈」，但我相信無電子奶咀，都總有好多方法令小朋友安靜。再講，十個有八個家長，俾電話小朋友都係開speaker，有啲仲要開到好大聲，其實一樣嘈住人

為咗小朋友，仲有你哋之間嘅親子關係，真係考慮下放棄電子奶咀啦，其實要小朋友出街食飯安靜真係有好多方法

讀者投稿@食電話先🙈